2019-04-13 14:58:48    60

Мамлакатимизда бугунги кунда инсон манфаатларини таъминлаш устувор вазифага айлаган бўлиб, одамлар билан мулоқот қилиш, уларни қайнаётган муаммоларни бартараф этиш борасидаги ишлар янги босқичга кўтарилди.

Бир неча йиллар давомида Чимён, Миндон, Қўрғонтепа, Хонқиз каби қишлоқларда яшовчи аҳоли туман маркази – Водилга боришда 70-80 километр йўл босиб, Фарғона шаҳри орқали кетишга мажбур бўларди. Қолаверса, жамоат транспортлари учун ҳам турли қийинчиликлар ва оворагарчиликлар юзага келарди.

Бугун бундай муаммолар ўз ечимини топди. Йўлсозлар томонидан Оқбилол ва Ямбарақ қишлоқлари ўртасида Чимён билан Водилни боғловчи 8 километр йўл қисқа муддатда қуриб битказилди. Мазкур йўл қурилишига 21 миллиард сўм маблағ сарфланди. Бу 30 километрлик йўл масофасини қисқартириб, одамларнинг йўл харажатларини камайишига хизмат қилади. Энг асосийси, кунлик қарийб 1,5 соат вақтини тежайди. Шунингдек, янги қурилган йўл Олтиариқ, Риштон туманларидаги 250 мингдан ортиқ аҳолининг ҳам узоғини яқин қилишга хизмат қилади.

Мазкур йўлни фойдаланишга топшириш маросими катта шодиёнага айланди. Унда туман аҳолиси, ёшлар ва кенг жамоатчилик вакиллари иштирок этди.

– Одамларнинг оғирини енгил, олис манзилини яқин қилиш ҳам савобли иш, – дейди Чимён қишлоғилик Ҳусанбой ота Қурбонов. – Ҳар куни туман марказига ишга, ўқишга, шифохонага ва бошқа турли юмуш билан қатнайдиган аҳоли ёки туман марказидан Чимёнга борадиган фуқаролар учун бу йўлнинг қурилгани катта иш бўлди.

Тадбирда Фарғона вилояти ҳокими Ш. Ғаниев сўзга чиқди.