1. Бош сахифа

ҚОЗОҒИСТОННИНГ ЎЗБЕКИСТОНДАГИ ФАВҚУЛОДДА ВА МУХТОР ЭЛЧИСИ ДАРХАН САТИБАЛДИ БОШЧИЛИГИДАГИ ДЕЛЕГАЦИЯ ВИЛОЯТИМИЗДА БЎЛДИ

×

Ташриф давомида меҳмонлар вилоят ҳокими ўринбосари Иқболжон Эргашев ҳамроҳлигида вилоятимиздаги қатор илғор корхоналар фаолияти билан танишдилар.

Қўқон шаҳридаги кунгабоқар ва пахта ёғи ишлаб чиқариш лойиҳаси амалга оширилган "Effect Oil" МЧЖ корхонасида бўлган қозоғистонликлар, хомашё таъминоти борасида, корхона маҳсулотларини Қозоғистонга экспорт масалаларида ҳамкорлик истиқболларини муҳокама қилдилар.

Учкўприк туманидаги доривор ўсимликлар етиштириш ва ишлаб чиқаришга ихтисослашган "Меҳригиё” корхонаси ҳам меҳмонларда катта таассурот қолдирди. Қозоғистон элчиси 100% маҳаллий ўсимликлардан тайёрланиб, ташкилотнинг ўзида қадоқланаётган доривор гиёҳларни сотиш учун Нур-Султон шаҳрида дастлабки савдо шахобчасини очиш таклифини илгари сурди.

Марғилон шаҳридаги "UzWoolontex" (Narimteks) МЧЖ шаклидаги қўшма корхонага ташриф ҳам самарали ўтди. Корхона раҳбарлари томонидан ўзаро ҳамкорликни йўлга қўйиш, Қозоғистонда ҳарбий соҳа вакиллари учун формалар ишлаб чиқараётган корхоналарга улар хозирги кунда импорт қилаётган матоларини арзон нархларда етказиб бериш таклифи билдирилди. Қозоғистон элчиси Дархан Сатибалди Қозоғистонда ушбу корхонанинг савдо уйини очишни таклиф қилди.

Фарғона туманидаги "Ekokerama" корхонаси маҳсулотларини Қозоғистон бозорига олиб кириш борасида ҳам келишиб олинди.

Меҳмонлар шунингдек, Фарғона шаҳрида жойлашган болалар ўйинчоқлари ва автомобиль эҳтиёт қисмлари ишлаб чиқарувчи "Fibra kabel" корхонасини, Фарғона туманидаги "Vodiy shoes", "Bahodir logon textile" ишлаб чиқариш мажмуасини, Марғилон шаҳридаги “Mister Fish” балиқчилик корхонасини ҳамда Ҳунармандлар марказини ҳам бориб кўрдилар.

Бизни ижтимоий тармоқларда кузатинг
Facebook, Telegram, Facebook, YouTube