1. Bosh sahifa

FARG’ONADA DAVLAT XIZMATLARI MARKAZLARIGA SURDOTARJIMONLAR JALB ETILDI

×

Farg’ona shahar davlat xizmatlari markazida eshitish va gapirishda nuqsoni bo’lgan fuqarolar uchun davlat xizmatlarini ko’rsatishda o’ziga xos yechim topildi. Ya'ni surdotarjimon shartnoma asosida ishga yollangan bo’lib, markazga keluvchi bu kabi fuqarolar maxsus planshet orqali tarjimonga videoaloqa orqali bog’lab berilyapti.

- O’rtacha bir oyda 10 ga yaqin gapirish va eshitishda nuqsoni bor fuqarolar markazga davlat xizmatlaridan foydalanish uchun tashrif buyuradi, - deydi Farg’ona shahar DXM bo’lim boshlig’i Zohidjon Akromov. - To’g’risi, avvallari ular bilan rasmiy muomalaga kirishishda muammolarga uchraganmiz. Videoqo’ng’iroq orqali mutaxassis orqali ular bilan gaplashish imkoniyati yaratilganidan so’ng ana shunday muammolarga barham berildi. 

Yaratilgan imkoniyatlardan xabardor qilish maqsadida eshitish va gapirishda nuqsoni bor yoshlar taklif etilib, ular uchun davlat xizmatlari markazida kichik sayohat tashkil etildi. Surdo-pedagog xodim yordamida nogironligi bor shaxslarga yaratilgan sharoitlar, fuqarolar va tadbirkorlar uchun imkoniyatlar, navbat olish, infolend, o’z-o’ziga xizmat ko’rsatish, xizmat olish zallari haqida batafsil tushuntirildi.

Ma'lumki, eshitish va gapirishda nuqsoni bor fuqarolar axborotga bo’lgan ehtiyojlarining 90 foizini ko’rish orqali qondiradi. Shuning uchun bu kabi shaxslarning davlat xizmatlarini onlayn olishga o’rgatish esa ayni muddao. Seminar-trening davomida my.gov.uz portalidan qanday foydalanish tartib taomillari amaliy tarzda tushuntirib berildi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram