1. Бош сахифа

ФАРҒОНАДА ТАДБИРКОРЛАР ҚАБУЛИ БЎЛИБ ЎТДИ

×

Бугун, 17 май куни Фарғона шаҳридаги “Тадбиркорлар уйи”да навбатдаги ҳафталик Тадбиркорлар қабули ташкил этилди. Унда 100 дан зиёд фуқаролар, кичик бизнес ва тадбиркорлик субъектлари вакиллари турли масалалар юзасидан мурожаатларни амалга оширдилар. Вилоят ҳокими ҳамда ўринбосари, тегишли бошқармалар, корхона ва ташкилот раҳбарлари иштирокида уларнинг ҳар бири эътибор билан ўрганиб чиқилди.

Ишбилармонлар иссиқхонага ер майдони ажратиш, бузилган бино учун компенсация тўловини ундириш, ўқув маркази ҳамда тикувчилик цехи фаолиятини йўлга қўйиш, хусусий боғча қуриш, кичик саноат зонаси имкониятларидан фойдаланиш, Жаҳон банки маблағларини ўзлаштириш, “Зиё” масканини юрғизиш жараёнлари билан боғлиқ масалаларни ўртага ташладилар.

Шунингдек, тадбиркорлик фаолиятларини кенгайтириш, кредит олиш, балиқчилик, чорвачилик, боғдорчилик, паррандачиликни ривожлантириш юзасидан илгари сурган ташаббуслар ҳам қўллаб-қувватланди.

Бувайдалик фермер Оятулло Кимсановнинг туманнинг “Янгиқадам” маҳалла фуқаролар йиғини ҳудудида туризм йўналишида комплекс бунёд этиш бўйича тақдим қилган 8 миллиард сўмлик лойиҳаси ҳам маъқулланди.

Экспорт-импорт билан шуғулланувчи қувалик тадбиркор Азим Мирзаалиевнинг тижорат банки билан боғлиқ масаласи ҳал этиладиган бўлди.

Тадбиркор Моҳинур Холиқназарованинг ўз маблағлари ҳисобидан Фарғона шаҳрида замонавий шифо маскани қуриш бўйича ишлаб чиққан лойиҳасига ижобий ечим белгиланди.

Қабулда ҳеч бир мурожаат эътибордан четда қолмади. Қонуний ечимга эга бўлмаган масалаларга эса жойнинг ўзида жавоб қайтарилиб, ҳуқуқий маслаҳатлар берилди. Муддат талаб этадиган муаммолар бўйича ишчи гуруҳлари шакллантирилиб, ўрганишлар натижасидан келиб чиқиб чора-тадбирлар белгиланадиган бўлди.

Бизни ижтимоий тармоқларда кузатинг
Facebook, Telegram, Facebook, YouTube