1. Бош сахифа

ФАРҒОНАДА 9-10 ИЮНЬ КУНЛАРИ ҲУДУДИЙ ТАРМОҚЛАРАРО САНОАТ ЯРМАРКАСИ БЎЛИБ ЎТАДИ

×

Жорий йилнинг 9-10 июнь кунлари Фарғона шаҳрида бўлиб ўтадиган ҳудудий тармоқлараро саноат ярмаркасида Республикамизнинг барча ҳудудлари вакиллари билан бирга Тожикистоннинг Сўғд ҳамда Қирғизистоннинг Баткен вилоятлари расмийлари ва тадбиркорларидан иборат делегациялар ҳам иштирок этишлари маълум бўлди.

Эртага Фарғона шаҳридаги “Само” спорт мажмуасида иш бошлайдиган ярмаркада вилоятдаги 300 дан зиёд тўқимачилик ва ипакни қайта ишлаш, чарм-пойабзал, мебелсозлик, нефть ва газ саноати маҳсулотларини ишлаб чиқариш, шунингдек, қурилиш материаллари, кимё саноати, электротехника, фармацевтика ҳамда қишлоқ хўжалиги маҳсулотларини қайта ишлаш корхоналарнинг 1000 дан ортиқ турдаги маҳсулотлари намуналари, ўзлаштирилиши режалаштирилаётган маҳсулотлар, саноат кооперацияси орқали маҳаллийлаштиришга таклиф қилинаётган маҳсулотлар ҳамда истиқболли лойиҳалар намойиш қилинади.

Ярмарка кун тартибида саноат маҳсулотлари кўргазмалари, электрон кооперация портали cooperation.uz фаолияти, саноат кооперациясини мустаҳкамлаш ва ривожлантириш, маҳаллий саноат маҳсулотлари ишлаб чиқарилишини янада кенгайтириш, кичик бизнес субъектларини саноат фаолиятига кенг жалб қилиш, инвестицион имкониятлар, тадбиркорликни ривожлантириш ҳамда тармоқлар ва ҳудудларда саноат салоҳиятини оширишга қаратилган тақдимотлар, B2B учрашувлар ва музокаралар ўтказилиши режалаштирилган.

Бизни ижтимоий тармоқларда кузатинг
Facebook, Telegram, Facebook, YouTube, Instagram