1. Бош сахифа

САНОАТ ИҚТИСОДИЁТНИНГ АСОСИЙ НЕГИЗИ ҲИСОБЛАНАДИ 

×

Қўқон шаҳрида ишлаб чиқариш ва саноат корхоналари азалдан иқтисодиётнинг негизи ҳисобланган. Қўқон шаҳар собиқ “Селикат” ғишт ишлаб чиқариш заводи ҳам салоҳиятли қурилиш маҳсулотларини етказиб берувчи завод ҳисобланган.

Вилоят ҳокими Хайрулло Бозаров Қўқон шаҳрига ташрифи жараёнида мазкур заводда бўлиб, соҳага тегишли мутасаддилар билан суҳбатлашди. Ҳудуд аҳолисини иш билан банд этиш ва бўш турган завод биносидан оқилона фойдаланиш мақсадида технопарк ташкил этишга келишиб олинди.

Режалаштирилган ишларни амалга ошириш натижасида 1000 нафар фуқароларни ишга жалб этиш имконияти яратилади.  

Шу ўринда таъкидлаш жоизки, Қўқон эркин иқтисодий зонасида бугун ишлаб чиқариш корхоналарининг кўлами ва самарадорлиги кундан кунга ортиб бормоқда. Шу куни вилоят ҳокими Хитой давлати билан ҳамкорликда ташкил этилган “Анделай” қўшма корхонасининг очилиш маросимида иштирок этди. 

Маросимда вилоят ҳокими Хайрулло Бозаров сўзга чиқиб, эркаклар кийим-кечак маҳсулотлари ишлаб чиқаришга ихтисослашган корхонанинг фаолиятига омад тилади. 1,5 млн. АҚШ доллар инвестиция маблағи ҳисобига қурилган корхонада бугунги кунда 200 нафар юртдошларимиз ўз иш ўринларига эга бўлдилар. Бу албатта бизни қувонтиради. 200 та оила ҳаёти фаровон бўлади, даромади ортади, деди вилоят раҳбари ўз сўзида.

Шундан сўнг, меҳмонлар корхонадаги ишлаб чиқариш жараёнлари ва ишчи-хизматчилар учун яратилган шарт-шароитлар билан танишдилар.  

Юқорида таъкидлаб ўтилганидек, Қўқон эркин иқтисодий зонасида тадбиркорлар томонидан янги ишлаб чиқариш корхоналари ташкил этилмоқда. Шулардан яна бири "Glorius business" масъулияти чекланган жамиятидир. Бу ерда аҳоли эҳтиёжи учун керакли бўлган велосипед ишлаб чиқариш йўлга қўйилди. Тадбиркор Абдувоҳид Аҳмедов томонидан 15 млрд. сўм маблағ ҳисобига 100 та янги иш ўринлари яратилишига эришилди. Вилоят раҳбари ташаббускор тадбиркорнинг янги лойиҳаси тақдимоти билан танишар экан, унинг эл-юрт манфаати йўлида амалга ошираётган хайрли ишларига омад тилади.

“Қўқонтехинвест” хусусий корхонасида бугунги кунда 300 нафар ишчилар меҳнат қилишади. Улар томонидан GM автомобилларига эҳтиёт қисмлари, қурилиш ва техник жиҳозлар ишлаб чиқарилади. Корхонанинг йиллик қуввати 2,5 млрд. ташкил этади.

Вилоят раҳбари корхонада бўлиб, ишчи-хизматчилар билан суҳбатлашди. Корхонанинг ишлаб чиқариш салоҳиятини янада ошириш бўйича керакли таклиф ва мулоҳазаларини билдирди. Заводнинг илгариги мавқеи ва салоҳиятини яна тиклаш борасида фикрлар алмашилди.

Шунинг билан вилоят ҳокими Хайрулло Бозаровнинг Қўқон шаҳрига қилган икки кунлик сафари ўз якунига етди.  

Фарғона вилояти ҳокимлиги