1. Bosh sahifa

FARG’ONADA ILK BOR TO’XTAB TURGAN YURAKDA AORTA KLAPANINI PROTEZLASH JARROHLIK AMALIYOTI O’TKAZILDI

×

Respublika shoshilinch tibbiy yordam ilmiy markazi Farg’ona filialida ilk bor to’xtab turgan yurakda aorta klapanini protezlash jarrohlik amaliyoti o’tkazildi.

Yurak klapanlari yaxshi ishlamasligi natijasida bemorning nafas qisishi, charchoq, ko’krak qafasidagi og’riqlar va yurak yetishmovchiligi bezovta qilgan. Poytaxtdan kelgan malakali kardioxirurglar va farg’onalik shifokorlar ushbu asoratlarni bartaraf etish, bemorni sog’lom hayotga qaytarish maqsadida ilk bor to’xtab turgan yurakda aorta klapanini protezlash jarrohlik amaliyotini o’tkazdi.

– Ushbu murakkab jarrohlik amaliyotini o’tkazish uchun muassasada barcha sharoit va imkoniyatlar yaratilgan, - deydi Respublika shoshilinch tibbiy yordam ilmiy markazi Farg’ona filiali direktori Bahodir Mamadjonov. – Germaniyada ishlab chiqarilgan “Shtokkert” sun'iy qon aylantirish apparati respublikamizda sanoqli, U jarrohlik amaliyoti vaqtida bemor yuragi to’xtatilgach yurak vazifasini bajaradi.

Viloyat markazlarida bu kabi murakkab jarrohlik amaliyotlarining o’tkazilayotgani tibbiyotdagi islohotlar, aholi salomatligi uchun yaratilayotgan imkoniyatlar samarasidir.

Ta'kidlash joiz, yil boshidan buyon Respublika shoshilinch tibbiy yordam ilmiy markazidan jalb etilgan yetakchi kardioxirurg mutaxassislar ishtirokida 9 nafar bemorda aorta-koronar shuntlash jarrohligi o’tkazilgan bo’lsa, iyun oyida yurak-qon tomir jarrohlik va mikroxirurgiya bo’limi shifokorlari tomonidan 4 nafar bemorda korotid endarterektomiya jarrohlik amaliyotlari muvaffaqiyatli olib borilgan va bemorlarning hayoti saqlab qolingan.

Hozirgi kunda bemorlarning ahvoli yaxshi, davo muolajalari davom ettirilmoqda.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram