1. Bosh sahifa

FARG’ONADA "BIZ BIR BO’LSAK, YAGONA XALQMIZ, BIRLASHSAK - VATANMIZ" SHIORI OSTIDA YOSHLAR FESTIVALI BO’LIB O’TDI

×

Bugun Farg’ona shahridagi “Istiqlol” stadionida “Biz bir bo’lsak, yagona xalqmiz, birlashsak – Vatanmiz” shiori ostida yoshlar festivali hamda galakontsert dasturi bo’lib o’tdi.

Festival doirasida yoshlarni vatanparvarlik ruhida tarbiyalash maqsadida viloyat ichki ishlar boshqarmasi boshlig’i, general-mayor Azizbek Ikramov ishtirokida “General va yoshlar”, Sharqiy harbiy okrug qo’shinlari qo’mondoni birinchi o’rinbosari Jamshid Karimov ishtirokida “Rahbar va yoshlar” uchrashuvlari tashkil etildi.

Shuningdek, viloyat soliq boshqarmasi boshlig’i Maqsud Mamatxonov hamda Markaziy bankning viloyat bosh boshqarmasi boshlig’i Shavkatjon Do’saliyev tadbirkorlik qilish istagida bo’lgan yoshlar bilan muloqot qildilar. Uchrashuvlarda yoshlar o’zlarini qiziqtirgan savol va takliflar bilan faollik ko’rsatishdi.

Festival davomida viloyatdagi oliy ta'lim muassasalari faoliyatini o’zida aks ettirgan ko’rgazmalar, Ma'naviyat va ma'rifat markazi viloyat bo’limi tashabbusi bilan kitob yarmarkalari tashkil etildi.

Bundan tashqari, Sharqiy harbiy okrug qo’shinlari qo’mondonligi, Milliy gvardiya viloyat bo’yicha boshqarmasi, viloyat ichki ishlar boshqarmasi hamda viloyat Favqulodda vaziyatlar boshqarmasi harbiy texnika va qurol-aslahalari, kiyim-kechak va oziq-ovqat mahsulotlari ko’rgazmalari ham barchada katta taassurot qoldirdi.

Milliy sport o’yinlari, stol tennisi, armrestling, kamondan o’q otish, shaxmat, shashka kabi qiziqarli musobaqalarda va yosh rassomlar ko’rgazmalarida ham o’g’il-qizlar o’z imkoniyatlarini namoyish etdilar.

Yakunda san'atkorlar ishtirokida galakontsert dasturi, harbiy orkestr ijrosidagi kuy-sadolar, harbiylar va “Vatanparvar” tashkilotining ko’rgazmali namoyishlari yig’ilganlarga ko’tarinki kayfiyat ulashdi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram