1. Bosh sahifa

FARG’ONADA XITOY SARMOYASI ISHTIROKIDA YIRIK ISHLAB CHIQARISH LOYIHASI AMALGA OSHIRILADI

×

Viloyat hokimi Xayrullo Bozorov Xitoyning Mycars (Shandong) International Trading kompaniyasi ta'sischilaridan iborat investorlar guruhini hamda kompaniyaning mahalliy hamkorlarini qabul qildi.

Uchrashuvda Mycars (Shandong) International Trading kompaniyasi tomonidan jami 15 million dollar to’g’ridan to’g’ri Xitoy investitsiyasi kiritish hisobiga Quvasoy shahri hududida amalga oshirishga kirishilayotgan yirik ko’p tarmoqli ishlab chiqarish loyihasi muhokama qilindi.

Viloyat hokimi Xayrullo Bozorov boshchiligidagi Farg’ona viloyati delegatsiyasining joriy yil sentyabr oyida Xitoyga amaliy tashrifi davomida ushbu kompaniya rahbarlari bilan muzokaralar o’tkazilib, ushbu loyiha bo’yicha dastlabki kelishuvga erishilgandi.

Rejaga ko’ra, dastlabki bosqichda yuqori sifatli avtoklavli gazobloklar hamda binolar fasadlari uchun bazalt izolyatsion plitalari ishlab chiqarish liniyalari ishga tushiriladi. Bunda qisqa muddatda 100 dan ortiq doimiy ish o’rni yaratiladi. Bugun yangi xorijiy korxona viloyatimizda davlat ro’yxatidan o’tkazildi, yaqin kunlarda loyihaning tamal toshini qo’yish rejalashtirilgan.

Ikkinchi bosqichda esa yuk ko’tarish kranlari yig’ish, shuningdek, veterinariya dori vositalari ishlab chiqarish yo’lga qo’yiladi. Umumiy hisobdan loyihaning barcha liniyalari ishga tushishi natijasida 300 dan ziyod ish o’rni yaratilishi ko’zda tutilgan.

Viloyat hokimi Farg’ona viloyati qurilish sohasi rivoji uchun muhim bo’lgan ushbu loyihalarni har tomonlama qo’llab-quvvatlashga tayyor ekanliklarini bildirdi.

Uchrashuvda viloyat hokimining o’rinbosari Nuriddin Mamajonov hamda viloyat hokimining Farg’ona va Xitoy o’rtasida hamkorlikni rivojlantirish masalalari bo’yicha maslahatchisi Otaxon Xayrullayev ishtirok etdilar.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram