1. Бош сахифа

ФАРҒОНА ШАҲРИДА “НОДАВЛАТ НОТИЖОРАТ ТАШКИЛОТЛАРИ УЙИ” ОЧИЛДИ

×

Бугун Фарғона шаҳрида “Нодавлат нотижорат ташкилотлари уйи” тантанали тадбир билан ўз фаолиятини бошлади.

Бинони фойдаланишга топшириш маросимида вилоят ҳокимининг ўринбосари Файзулло Қосимов, Олий Мажлис Қонунчилик палатаси депутати, Парламент комиссияси раиси Адҳам Шодмонов, тегишли масъул раҳбарлар, вилоятда фаолият олиб бораётган ННТлар ва кенг жамоатчилик вакиллари, оммавий ахборот воситалари ходимлари қатнашдилар.

Ўзбекистон Республикаси Президентининг 2018 йил 4 майдаги “Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида”ги Фармони ижроси доирасида Фарғона шаҳридаги собиқ Компьютер технологиялари коллежининг бўш турган биноси қайта таъмирланиб, “Нодавлат нотижорат ташкилотлари уйи” ташкил этилди. Вилоят маҳаллий бюджети ҳисобидан таъмирлаш ва жиҳозлаш учун 1,5 миллиард сўм маблағ сарфланди. 

Тадбирда сўз олганлар мамлакатимизда нодавлат нотижорат ташкилотларига тобора эътибор кучайиб бораётганлигини, жамиятда нодавлат нотижорат ташкилотларининг роли ва аҳамияти ошаётганлигини таъкидладилар.

“Давлатимиз раҳбарининг ташаббуслари билан аҳоли фикрини мунтазам равишда ўрганиб бориш, уларнинг ечимини топиш бўйича давлат идоралари олдига аниқ вазифаларни қўйиш функцияси юклатилган, жамоатчилик асосида ишлайдиган 50 нафар аъзодан иборат Жамоатчилик палатаси ташкил этилди. Жамоатчилик эшитуви, жамоатчилик мониторинги, жамоатчилик экспертизаси, жамоатчилик ташаббуси каби таъсирчан назорат шакллари ҳаётга татбиқ этилмоқда”, - деди вилоят ҳокими ўринбосари Файзулло Қосимов.

Бинонинг рамзий калити ўз эгаларига тантанали тарзда топширилди. Қурувчиларга эсдалик совғалари берилди. Карнай-сурнай садолари остида тасма қирқилиб, меҳмонлар яратилган қулайликлар билан танишдилар.

Мавжуд 33 та хона, конференция заллари, коворкинг маркази ва дам олиш жойи иштирокчиларда илиқ таассурот қолдирди.

“Нодавлат нотижорат ташкилотлари уйи”га вилоятда ижтимоий аҳамиятга эга бўлган соҳаларда ўз фаолиятини амалга ошираётган 17 та нодавлат нотижорат ташкилоти ижара тўловининг «ноль» ставкасини қўллаган ҳолда жойлаштирилди ва келгусида ҳам Ўзбекистон нодавлат нотижорат ташкилотлари миллий ассоциацияси вилоят бўлинмаси тавсияси асосида талабгор ННТлар жойлаштирилиб борилади.

Бугунги кунда вилоятда адлия бошқармаси томонидан рўйхатдан ўтган 777 та нодавлат нотижорат ташкилотлари фаолият юритмоқда. Уларнинг 127 таси давлат рўйхатидан, 296 таси ҳисоб рўйхатидан ўтган ва 354 таси юридик шахс мақомига эга бўлган ННТлар ҳисобланади.

Бизни ижтимоий тармоқларда кузатинг
Facebook, Telegram, Facebook, YouTube