1. Бош сахифа

“КИТОБХОНЛИК ҲАФТАЛИГИ” ДОИРАСИДА ФАРҒОНАДА КИТОБ ФЕСТИВАЛИ БЎЛИБ ЎТАДИ

×

Жорий йилнинг 18-23 апрель кунлари мамлакатимиз миқёсида ўтказиладиган “Китобхонлик ҳафталиги” доирасида I Фарғона китоб фестивали ҳам ташкил этилади.

Вилоят ҳокимлиги йиғилиш баёни билан тасдиқланган чора-тадбирлар режасига кўра, Фестиваль давомида республика ва вилоят нашриётлари, китоб дўконлари иштирокида китоб ярмаркалари ташкил этиш, муаллифлик китоблари тақдимоти ва дастхат қўйиш маросимини ўтказиш учун республика, айниқса, водий вилоятларининг таниқли ижодкорларини жалб этиш, шунингдек, китоб ва босма нашрлар чоп этиш соҳасидаги янгиликлар кўргазмасини ташкил этиш кўзда тутилган.

Фарғонада бўлиб ўтадиган “Китобхонлик ҳафталиги” доирасида вилоят миқёсида “Энг яхши китобхон ҳудуд”, “Энг яхши китобхон маҳалла”, “Энг яхши китобхон таълим муассасаси”, “Энг намунали китоб дўкони” кўрик-танловлари ўтказилади, вилоятдаги барча олий таълим муассасалари талабалари ўртасида “Энг китобхон талаба”, “Энг китобхон гуруҳ”, “Энг китобхон факультет” интеллектуал танлов ва ўйинлари ташкил этилади.

Вилоятда Ахборот-кутубхона марказларини ҳар томонлама қўллаб-қувватлаш ҳамда ҳудудларда китобхонлик маданиятини ривожлантириш мақсадида тажриба сифатида вилоят ҳокими Аҳмад Фарғоний номидаги вилоят ахборот-кутубхона марказининг, шаҳар ва туман ҳокимлари ҳудудий ахборот-кутубхона марказларининг Фахрий раислари этиб белгиланди.

“Китобхонлик ҳафталиги” кунларида вилоятимизнинг таниқли санъаткор ва хонандалари иштирокида гала-концерт ташкил этилиб, концертдан тушадиган маблағлар вилоят кўзи ожизлар кутубхонаси китоб фондини бойитишга йўналтирилади.

Бизни ижтимоий тармоқларда кузатинг
Facebook, Telegram, Facebook, YouTube, Instagram