1. Бош сахифа

ВИЛОЯТ ҲОКИМИ ХАЙРУЛЛО БОЗОРОВ КОРЕЯ РЕСПУБЛИКАСИНИНГ ЭЛЧИСИНИ ҚАБУЛ ҚИЛДИ

×

Вилоят ҳокими Хайрулло Бозоров Корея Республикасининг мамлакатимиздаги Фавқулодда ва Мухтор элчиси Ким Хи Сангни қабул қилди.

Самимий мулоқот давомида Фарғона вилояти ва Корея ўртасида савдо-иқтисодий, инвестициявий, таълим ва маданий-гуманитар соҳаларда ҳамкорлик муносабатларини янада ривожлантириш борасида фикр алмашилди.

Сўнгги йилларда мамлакатларимиз ўртасидаги муносабатлар барча соҳаларда янги босқичга кўтарилаётганини қайд этган Ким Хи Санг, бу борада Фарғона вилояти алоҳида ўрин тутаётганини, Республикамиз ҳудудлари орасида Корея билан ҳамкорлик даражаси энг юқори бўлган вилоят Фарғона бўлиб турганига эътибор қаратди.

Вилоят раҳбари ривожланган мамлакатлар билан ҳамкорлик кўламини кенгайтириш халқаро муносабатларда Фарғона учун устуворлик касб этаётганини таъкидлаб, барча хорижий ҳамкорлар қатори Корея компанияларининг ҳам вилоятимизда амалга ошираётган лойиҳалари ҳар томонлама қўллаб-қувватланишини билдирди.

Вилоятимизда таълим соҳасида Корея билан ҳамкорликда амалга оширилаётган ишлар ҳам учрашув кун тартибидан алоҳида ўрин олди. Корея халқаро ҳамкорлик агентлиги – KOICA билан шерикликда ташкил этилган касб-ҳунарга ўқитиш маркази вилоятимиз ёшларини замонавий касбларга ўқитишда самарали фаолият олиб бораётгани қайд этилди. Эртага фойдаланишга топшириладиган, Фарғона шаҳрида “POSCO International Textile” корхонаси томонидан қуриб битказилган ёшлар касбий таълим маркази ҳам бу борада яна бир муҳим қадам экани таъкидланди.

Фарғона шаҳридаги Корея халқаро университети томонидан Кореянинг ривожланган кемасозлик саноати учун вилоятимиз ёшларини юқори малакали мутахассислар сифатида тайёрлаш бўйича режалаштираётган лойиҳасини амалга оширишга икки томонлама кўмаклашишга келишилди.

Икки мамлакат ўртасида муносабатларни ривожлантиришда маданий алоқалар ҳам муҳим эканлиги қайд этилди. Ўзбекистон ва Корея Республикалари ўртасида дипломатик муносабатлар ўрнатилганлигининг 30 йиллигини нишонлаш доирасида мамлакатимизда ўтказилаётган “Корея кинофестивали”нинг очилиш маросими эртага айнан Фарғонада бўлиб ўтиши ҳам рамзий маъно касб этиши таъкидланди.

Учрашувда Фарғона вилоятининг Корея билан ҳудудлараро ҳамкорлигини янги босқичга олиб чиқиш истиқболларига алоҳида тўхталиб ўтилди. 2008 йилда Фарғона вилояти билан биродарлашган шаҳар келишуви имзолаган Йонгин шаҳри билан бирга, иқтисодиёти ва саноати жиҳатидан янада ривожланган Инчхон шаҳри билан ҳам алоқаларни кенгайтириш борасида фикр алмашилди. Жорий йил якунига қадар Инчхон мэри бошчилигидаги делегациянинг вилоятимизга ташрифи билан боғлиқ масалалар муҳокама қилинди.

Бизни ижтимоий тармоқларда кузатинг
Facebook, Telegram, Facebook, YouTube, Instagram