1. Бош сахифа

МОСКВАДА ЎЗБЕКИСТОН – РОССИЯ ИККИНЧИ ҲУДУДЛАРАРО ҲАМКОРЛИК ФОРУМИ БЎЛИБ ЎТДИ

×

Ўзбекистон Республикаси президенти Шавкат Мирзиёевнинг 19 ноябрь куни бошланадиган Россия Федерациясига давлат ташрифи олдидан Москвада Ўзбекистон – Россия иккинчи ҳудудлараро ҳамкорлик форуми бўлиб ўтди. Вилоят ҳокими Хайрулло Бозоров форум ишида Фарғонадан онлайн иштирок этди.

Икки мамлакат вилоятлари ҳамда республикалари раҳбарлари, вазирлари ва бошқа расмийлари иштирокида ўтказилган ушбу анжуман Ўзбекистон президенти Шавкат Мирзиёев ва Россия Президенти Владимир Путиннинг форум иштирокчиларига видеомурожаатлари билан бошланди. Давлатимиз раҳбарининг чиқишида ҳамкорликда амалга оширилаётган муваффақиятли йирик лойиҳалар қаторида Риштон туманидаги “Рус Ўзбектекс” пахтачилик кластери томонидан амалга оширилаётган ишлар ҳам қайд этилди.

Ўзбекистон Республикаси Бош вазирининг ўринбосари – инвестициялар ва ташқи савдо вазири Сардор Умрзоқов ва Россия Федерацияси иқтисодий ривожланиш вазири Максим Решетников ҳамраислигида ўтказилган форумда икки мамлакат ҳудудлари ўртасида мустаҳкам ва узоқ муддатли шериклик муносабатларининг бугунги ҳолати таҳлил қилинди, ривожлантириш истиқболлари муҳокама қилинди.

Фарғона вилоятида бугунги кунда Россия капитали иштирокида 125 та корхона фаолият олиб бормоқда. Сўнгги тўрт йил ичида бундай корхоналар сони 2,5 баробарга ошганини қайд этиш лозим. Вилоятимизнинг Россия Федерацияси билан ўзаро савдо айланмаси жорий йилнинг ўтган ўн ойида 338,7 миллион долларни ташкил этди. Бу борада ўтган йилнинг мос даврига нисбатан 132 фоиз ўсиш қайд этилди. 2021 йил январь-октябрь ойларида Россияга вилоятимиз саноат ва қишлоқ хўжалиги маҳсулотлари экспорти ҳажми эса 193,7 миллион долларга тенг бўлди.

Бизни ижтимоий тармоқларда кузатинг
Facebook, Telegram, Facebook, YouTube