1. Бош сахифа

ҚУВАДА ЯНГИ ИШ ЎРИНЛАРИ ЯРАТИЛАДИ: САНОАТ ЗОНАЛАРИ ТАШКИЛ ЭТИЛИБ, АДИР ВА ТОШЛОҚ ЕРЛАР ЎЗЛАШТИРИЛМОҚДА

×

Вилоят ҳокими Хайрулло Бозоров Қува туманидаги ўрганишлари давомида “Турк” МФЙ даги “Турк-2” кичик саноат зонаси ҳамда “Турк-2” ёшлар кичик саноат зонасидаги лойиҳалар билан танишди.

Ишлаб чиқариш майдони 6 гектардан иборат бўлган “Турк-2” кичик саноат зонаси жами 59 та лотларга ажратилган. Қиймати 35.6 млрд.сўмлик 40 та лойиҳа жойлаштирилиб, бунинг натижасида 470 тадан зиёд янги иш ўринлари яратилиши белгиланган. Ҳозирда 30 та лойиҳа бўйича қурилиш ишлари олиб борилмоқда. Мебель ишлаб чиқариш, ширинликлар тайёрлаш, сутни қайта ишлаш ва бошқа йўналишларда тадбиркорлар ўз фаолиятларини бошлаш арафасида.

“Турк-2” ёшлар кичик саноат зонасининг умумий ер майдони эса 7.34 гектар бўлиб, шундан ишлаб чиқариш майдони 5.71 гектардан иборат. Ушбу кичик саноат зонаси 59 та лотларга ажратилган. Ҳозирда умумий қиймати 33.6 млрд. сўмлик 47 та лойиҳа жойлаштирилган. Улар ишга тушса 450 ўриндан зиёд янги иш жойлари яратилади. Тикувчилик, қурилиш моллари ишлаб чиқариш ва бошқа йўналишларда тадбиркорлар иш бошлайдилар. Вилоят ҳокимига мана шулар хусусида маълумотлар берилди. Ишбилармонлар билан мулоқотда вилоят раҳбари коммуникация тармоқлари билан боғлиқ масалалар ҳам тез фурсатларда тўла ҳал этилишини айтиб, мутасаддиларга зарур топшириқлар берди. 

Вилоят ҳокими тумандаги Шербўтаев ММТП ҳудудида янги ўзлаштирилаётган ерларни ҳам бориб кўрди. Фермер Каримжон Ашуров ўтган йилдан буён қарийб 80 гектар тошлоқ ерни ўзлаштирганлигини, айниқса, хориждан тош майдалайдиган техника олиб келганидан сўнг ишлар янада жадал тус олганлигини айтиб ўтди. У эртапишар ўрик навларини экиб, эрта баҳордан боғ яратиш ишларига киришишини маълум қилди.

Шунингдек, Туркия технологияси асосида бир кунда 50 гектар майдонга сув етказиб бериш имконига эга бўлган суғориш тизимини йўлга қўйганлиги фаолиятини самарали бўлишида қўл келишини таъкидлади.

Бизни ижтимоий тармоқларда кузатинг
Facebook, Telegram, Facebook, YouTube, Instagram