1. Бош сахифа

Байроғимиз - фахримиз, ғуруримиз

×

Вилоятимизда ҳам 18 ноябрь – Ўзбекистон Республикаси давлат байроғи қабул қилинган кун кенг нишонланмоқда. Фарғона шаҳридаги Ислом Каримов номидаги Театр-концерт саройи ҳиёбонида тантанали тадбир бўлиб ўтди.

Тадбирда Фарғона вилояти ҳокими Шуҳрат Ғаниев иштирок этиб, барчани давлат байроғи қабул қилинган кун билан табриклади. Вилоят ҳокими ўз сўзида давлат рамзлари ҳар бир халқнинг мустақиллиги, озодлиги, тинчлиги, барқарорлигининг тимсоли эканлигини, буюк аждодларимиз ҳам юрт байроғини муқаддас билиб, уни кўз қорачиғидек ардоқлаганини таъкидлади.

Ранглар жилосида бахт ва осойишталик улашиб ҳилпираётган миллий байроғимизга кўзимиз тушганда, уни фаҳр билан кўкка кўтарганимизда бутун вужудимиз ҳаяжонга, фахру ифтихорга тўлади. Истиқлолимиз, бахт-иқболимиз рамзи бўлган миллий байроғимизни севиб қадрламаган киши топилмаса керак.

Фарғона шаҳрининг марказий кўчалари бўйлаб давлатимиз байроқларини кўтарган бир гуруҳ фаоллар, кўрик-танловлар ва жаҳон чемпионатлари ғолиблари ва ёшларнинг ҳарбий оркестр жўрлигида юриши барча юртдошларимиз кўнглини фахр ва ифтихор туйғуларига тўлдирди.

–Танловда ғолиблик дипломини қўлимга олгач ҳаяжон билан минглаб томошабинлар орасидан устозимни излай бошладим, – дейди Испаниянинг Льоред-де мар шаҳрида бўлиб ўтган “Sea sun festivаl” халқаро кўрик-танлов ғолиби Фарзона Юлдашева.–Устозим Олимжон Икромов давлат байроғимизни баланд ҳилпиратганча мени қутларди. Шу дам қалбимдан бир оташ отилди, хурсандчилик ёшлари юзимни ювди. Мен ўзбек қизи сифатида юртимиз байроғини дунё саҳнасида туриб баланд кўтара олганимдан хурсанд эдим.

Тадбирнинг бадиий қисмида Эркин Воҳидов номидаги ижодкорлар мактаби ўқувчиларининг Ватан, дўстлик ва тинчликни тараннум этувчи шеърлари, эстрада хонандаларининг концерт дастурлари тадбир иштирокчиларининг олқишларига сазовор бўлди.

Фарғона вилояти ҳокимлиги Ахборот хизмати