1. Бош сахифа

УЧКЎПРИК ТУМАНИДА ИЖАРАГА ЕР ОЛГАН ЭҲТИЁЖМАНД ЁШЛАР БУГУН МЎМАЙ ДАРОМАД КЎРМОҚДА

×

Учкўприк туманида ишсиз ёшларнинг бандлигини таъминлаш, улар ўртасида тадбиркорликни ривожлантириш ва турмуш шароитини янада яхшилаш борасида аниқ чора-тадбирлар ишлаб чиқилган.

“Ёшлар дафтари”га киритилган, қишлоқ хўжалиги соҳасида меҳнат қилиш истагида бўлган ишсиз ёшларга деҳқончилик учун ижара асосида ер берилгани ҳам бугун ўз самарасини кўрсатмоқда.

Жорий йил аввалида тумандаги “Ҳасанқора” маҳалла фуқаролар йиғинида истиқомат қилувчи 16 нафар эҳтиёжманд ёш “Ҳасанқора қўрғони” фермер хўжалиги тасарруфидаги унумдор экин майдонидан 15 сотихдан ер олган эди.

Эрта баҳордан деҳқончилик ишларини бошлаган ёшлар бугун меҳнатлари маҳсулидан мамнун бўлиб, дастлабки ҳосилларини йиғиштириб олмоқда.

Айни кунларда бу ерда ёшларнинг баъзилари ўз экинларидан ҳосил кўтараётган бўлса, айримлари сўнгги парвариш ишлари билан банд. Далада ёшлар эккан картошка, сабзи, помидор, ловия, карам ва гулкарам мўл ҳосил туккан.

Умиджон Юсупов “Ҳасанқора” маҳалла фуқаролар йиғинида яшайди. У ишсиз бўлиб, “Ёшлар дафтари" рўйхатига киритилган. Маҳалладаги ёшлар етакчиси таклифи ва ҳоким ёрдамчиси тавсияси асосида 15 сотих ер олган.

Умиджон ёшларга кўрсатилаётган бундай ғамхўрликдан мамнун. Ўзи учун ажратиб берилган ерда карам парваришлаб, юқори ҳосил кўтарди.  

– Шу ерда ишлаб, ҳалол меҳнат қилиб, оиламиз даромадига ўз ҳиссамни қўшиш имконияти берилганидан хурсандман. Февраль ойида ер олиб, уруғ қадаган эдик. Бугун илк ҳосилни йиғиштириб оляпмиз. Июнь ойи давомида бу ерга яна карам экамиз, кузда эса шолғом етиштирамиз. Мавсум давомида уч марта ҳосил кўтариб, ўртача 50-55 миллион сўм даромад олишни кўзлаб турибмиз, – дейди Умиджон Юсупов.

Баҳорда ижара асосида ер олган кўплаб ёшлар бугун илк ҳосилни кўтариб, ҳалол меҳнатларининг мевасини татиб кўрмоқда. Мўмай даромад олиб, оила бюджетига ўз ҳиссаларини қўшмоқда.

Учкўприк тумани ҳокимлиги ахборот хизмати

Бизни ижтимоий тармоқларда кузатинг
Facebook, Telegram, Facebook, YouTube, Instagram