1. Бош сахифа

ФАРҒОНАДА “ЎЗБЕКИСТОН ҚАҲРАМОНЛАРИ” КИТОБ-АЛЬБОМИНИНГ ТАҚДИМОТИ БЎЛИБ ЎТДИ

×

Республика Маънавият ва маърифат маркази ташаббуси билан нашр этилган ушбу китоб-альбомнинг Фарғона давлат университетида ўтказилган тақдимотида давлат ва жамоат ташкилотлари вакиллари, университет профессор-ўқитувчилари, талаба ёшлар қатнашдилар.

Тадбирда иштирок этган вилоят ҳокимининг ўринбосари Файзулло Қосимов қаҳрамонларнинг ҳаёти замонамиз ёшлари учун ҳақиқий ибрат мактаби эканини қайд этди.

Ушбу китоб-альбом миллатимиз қаҳрамонларига эҳтиром сифатида яратилганлиги, унда Ватанимиз тараққиётига беқиёс ҳисса қўшиб, “Ўзбекистон Қаҳрамони” юксак унвони ҳамда “Олтин Юлдуз” медали билан тақдирланган 103 нафар юртдошимизнинг ибратли ҳаёти ва фаолияти ҳақида ҳикоя қилиши билан аҳамиятлидир. Тадбирда иштирок этган Ўзбекистон Қаҳрамони Улуғбек Умаров ўз миннатдорчилигини билдириб, фидойилик билан меҳнат қилган ҳар бир киши қаҳрамон бўлиши мумкинлигини қайд этди.

Китобда ҳаётнинг турли синовларига қарамай сабот билан меҳнат қилиб, халқимиз фаровонлиги йўлида хизмат қилган давлат ва жамоат арбоблари, олимлар, ишчи-хизматчилар, устозлар, деҳқон ва чорвадорлар, санъат ва маданият ходимлари, барча жабҳаларда олиб борилаётган юксак бунёдкорлик ишларида доимо камарбаста бўлган замондошларимизнинг умр йўллари акс этган.

Фарғоналик қаҳрамонлар ҳақида видеоролик намойиш этилди, талабалар томонидан тайёрланган мусиқий чиқишлар барчага манзур бўлди. Тадбир сўнгида Республика Маънавият ва маърифат маркази вилоят бўлими томонидан Ўзбекистон Қаҳрамони Улуғбек Умаровга эсдалик совғалари топширилди.

Бизни ижтимоий тармоқларда кузатинг
Facebook, Telegram, Facebook, YouTube, Instagram