1. Bosh sahifa

“TASHABBUSLI BYUDJET” LOYIHASI DOIRASIDA VILOYATIMIZDA QO’SHIMCHA 43 TA TAKLIF MOLIYALASHTIRILADIGAN BO’LDI 

×

Avvalroq 1 aprel kuni e'lon qilingan “Tashabbusli byudjet” loyihasining ilk mavsumi yakuniga ko’ra, Farg’ona viloyatidan “Tashabbusli byudjet” loyihasida umumiy qiymati 115,4 mlrd. so’m bo’lgan 204 ta taklif g’olib bo’lgani haqida xabar bergan edik.

Kuni kecha Prezident qarori bilan, 2022 yilning fevral-mart oylari davomida o’tkazilgan “Tashabbusli byudjet” jarayonlarida fuqarolarning faol ishtirokini inobatga olgan holda g’olib deb topilgan 2 215 ta loyihaga qo’shimcha, har biri 2 mingdan ortiq ovoz to’plagan, lekin g’olib deb topilmagan 139 ta loyihani amalga oshirish uchun qo’shimcha ravishda respublika byudjetidan 85,4 mlrd. so’m mablag’ ajratildi. Xususan, viloyatimizdan ham yana qo’shimcha 43 ta loyihaga 21 mlrd. 185 mln. so’m mablag’ yo’naltirilishi ko’rsatib o’tildi.

Umumta'lim maktablarini ta'mirlash va moddiy-texnika bazasini rivojlantirish uchun 19 ta taklif, ichki yo’llarni ta'mirlash uchun 9 ta taklif, shuningdek, hududlarda ichimlik suvi va oqava tizimini yaxshilash, ko’cha chiroqlarini o’rnatish yoki ta'mirlash, maktabgacha ta'lim muassasalarini ta'mirlash va moddiy-texnika bazasini rivojlantirish, mahalla guzarini ta'mirlash-tiklash va qonun hujjatlari bilan belgilangan mezonlarga muvofiq boshqa tadbirlar bilan bog’liq takliflar moliyalashtiriladigan bo’ldi. 

E'tiborlisi, “Tashabbusli byudjet” loyihasida Farg’ona viloyatidan aholining 28,9 foizi qatnashdi va bu bo’yicha Respublikada eng yuqori ko’rsatkich qayd etildi. Qo’shimcha takliflarga mablag’lar ajratilishida ham Farg’ona yuqori o’rinni egalladi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram