1. Bosh sahifa

FARG’ONADA HOKIM YORDAMCHILARI UCHUN 2 KUNLIK MALAKA OSHIRISH SEMINARI BOSHLANDI

×

Bugun Farg’ona shahridagi “Ishga marhamat” monomarkazida “Hokim yordamchilari faoliyatini samarali tashkil qilish, mahallada tadbirkorlikni rivojlantirish, aholi bandligini ta'minlash va kambag’allikni qisqartirish yo’llari” mavzusida hokim yordamchilari uchun malaka oshirish seminari boshlandi. Unga Farg’ona shahri va yaqin hududlardan jami 205 nafar hokim yordamchilari jalb etildi.

Prezidentimiz rahbarligida joriy yil 19 aprel kuni kengaytirilgan tarzda o’tkazilgan videoselektor yig’ilishida berilgan topshiriqlar ijrosini ta'minlash maqsadida viloyatimizda faoliyati “qoniqarsiz” deb topilgan hokim yordamchilarining bilim va ko’nikmalarini oshirish uchun qator o’quv-seminarlar yo’lga qo’yilishi belgilandi.

Bugungi seminar avvalida Prezidentimizning tegishli qaror va farmonlari talablari ijrosini ta'minlash uchun viloyatda amalga oshirilayotgan ishlar haqida ma'lumot berildi.

Xususan, viloyatimizda 1055 ta mahallalarga tayinlangan hokim yordamchilari tomonidan jami 759,2 ming xonadonlar to’liq xatlovdan o’tkazilib, “Onlayn mahalla” (www.online-mahalla.uz) platformasiga kiritilgan.

2022 yilning 1-chorak natijalari bo’yicha viloyatdagi hokim yordamchilari faoliyatining eng muhim samaradorlik ko’rsatkichlari 0 dan 100 ballgacha tizim bo’yicha baholandi.

Viloyat bo’yicha Bag’dod tumani Chekxitoy MFYdagi hokim yordamchisi Nurmat G’oziyev faoliyati 98.18 ball bilan eng yuqori ko’rsatkichga ega bo’lgani ma'lum qilindi. Shu bilan birga, yetarli darajada ish tashkil etmagan hokim yordamchilari faoliyatiga tanqidiy e'tibor qaratildi.

Tashkil etilgan 2 kunlik seminarga oliy ta'lim muassasalari o’qituvchilari, mutaxassislar ham taklif etilib, ular tomonidan ishtirokchilarga o’z faoliyatlarini samarali tashkil qilish bo’yicha zarur tavsiya va yo’riqnomalar berilmoqda.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram