1. Bosh sahifa

KASB-HUNAR MAKTABLARIGA QABUL BOSHLANDI

×

Mamlakatimizda 2022-2023 o’quv yili uchun kasb-hunar maktablariga qabul jarayoni boshlandi. Bu yil viloyatimizdagi 32 ta kasb-hunar maktablariga 37 ta yo’nalishdagi kasb-hunar bo’yicha umumta'lim maktablarining 9-sinfini bitirgan 7990 nafar o’quvchilarni qabul qilish rejalashtirilgan.

Ta'kidlash kerak, bugungi kunga qadar umumta'lim maktablari va kasb-hunar maktablari hamkorligida o’quvchilarning kasbiy qiziqishlarini aniqlash va kasbga yo’naltirish maqsadida ochiq eshiklar kuni, uchrashuvlar hamda turli tadbirlar o’tkazildi. O’tkazilgan tadbirlarda o’quvchilar va ularning ota-onalari ishtirokini ta'minlash natijasida 12 ming nafardan ortiq o’quvchilar kasb-hunar maktablarida o’qish istagini bildirgan.

Furqat tumanidagi kasb-hunar maktabida qabul jarayoni namunali tarzda tashkil etilmoqda. Ta'lim muassasasida o’qish istagini bildirgan o’quvchilar o’z ota-onalari yoki maktab psixologi hamrohligida kelishib, hujjatlarini topshirishmoqda. 

– Bu yil maktabimizga 4 ta yo’nalish bo’yicha 210 nafar o’quvchi qabul qilinishi rejalashtirilgan. Tashrif buyuruvchilar uchun barcha shart-sharoit yaratilgan. Qabul komissiyasi a'zolari ular bilan bafurja suhbatlashib, o’quvchilar qiziqqan yo’nalish uchun hujjatlarni qabul qilib olishyapti, – deydi kasb-hunar maktabi direktori Shahzodaxon Abdullayeva. 

Vazirlar Mahkamasining 715-sonli qaroriga asosan, kasb-hunar maktablariga 1-20 iyul kunlari joriy yilda umumta'lim maktablarining 9-sinfini bitirgan o’quvchilar o’zlari tanlagan kasblar bo’yicha hujjat topshirishlari mumkin. Shuningdek, qabul jarayoni onlayn tarzda ham amalga oshirilishi belgilangan bo’lib, o’quvchilar masofadan turib hujjatlarini topshirishlari mumkin.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram