1. Bosh sahifa

FARG’ONADA MEVA-SABZAVOT MAHSULOTLARINI DALADAN ISTE'MOLCHIGA YETKAZIB BERISH ZANJIRINI RIVOJLANTIRISHDA XALQARO TAJRIBA OMMALASHTIRILADI

×

Bugun Farg’ona shahrida viloyat hokimligi va Investitsiyalar va tashqi savdo vazirligi hamkorligida shahar-tuman hokimliklari mas'ullari, qishloq xo’jaligi mahsulotlari ishlab chiqaruvchilar, eksportchilar ishtirokida Birlashgan Millatlar Tashkiloti Taraqqiyot dasturi doirasida “Meva-sabzavot mahsulotlarini daladan iste'molchiga yetkazib berish zanjirini rivojlantirishda xalqaro tajriba” mavzusidagi seminar-trening boshlandi.

Tadbirni viloyat hokimining o’rinbosari Iqboljon Ergashev ochib berdi. Meva-sabzavot mahsulotlari yetishtirish va ularning tashqi bozorlarga eksport qilishda Respublikada yetakchi bo’lgan Farg’ona viloyati uchun xorijiy iste'molchilarning ehtiyoji va talabini oldindan ko’ra bilish, chet el bozorlarini to’g’ri tushunish katta ahamiyat kasb etishini qayd etgan Iqboljon Ergashev, bugungi seminar daladan iste'molchigacha bo’lgan “masofani” qamrab olgan jarayonni tashkil etishdagi yondashuvni xalqaro tajriba asosida muvofiqlashtirishga hissa qo’shishini ta'kidladi.

Qishloq xo’jaligi mahsulotlari bozoridagi xalqaro tendentsiyalarni va mahalliy meva-sabzavotlarning o’rnini atroflicha tahlil qilish, yetkazib berish zanjirlaridagi tartib va qoidalarni muhokama qilish hamda marketing strategiyalarini ishlab chiqishda ko’nikmalarni oshirish seminar-trening kun tartibidan o’rin oldi.

Xalqaro trener Oksana Antonova dastlab ishtirokchilarga meva-sabzavot bozoridagi global tendentsiyalar to’g’risida ma'lumot berdi. Shundan so’ng O’zbekiston meva-sabzavotchilik tarmog’i tahliliga e'tibor qaratildi.

Kun bo’yi davom etadigan seminar-treningda jozibador bozor yo’nalishlari, sinov va xatolar tahlili, mahsulotlarni bozorga chiqarish va ilgari surish strategiyalari, bozorni baholash, raqobat, xavflar va istiqbollar kabi ko’plab yo’nalishlarda ma'ruzalar eshitilib, muhokamalar o’tkazilishi rejalashtirilgan.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram