1. Bosh sahifa

FARG’ONA-OZARBAYJON IQTISODIY HAMKORLIGIDA YANGI ISTIQBOLLAR OCHILMOQDA

×

Viloyat hokimining o’rinbosari Iqboljon Ergashev Turkiya Sanoatchilar va tadbirkorlar mustaqil assotsiatsiyasi (MÜSİAD)ning Ozarbayjon bo’linmasi rahbari o’rinbosari Sait Yinanch boshchiligidagi ishbilarmonlar delegatsiyasini qabul qildi.

Muloqotda Mahallabay ishlash va tadbirkorlikni rivojlantirish agentligi va Ozarbayjon Respublikasi Kichik va o’rta biznesni rivojlantirish agentligi o’rtasida o’zaro hamkorlikni yo’lga qo’yish va tadbirkorlikni rivojlantirish bo’yicha joriy yilning 16 sentyabr kuni imzolangan “yo’l xaritasi” doirasida Farg’ona viloyatida amalga oshirish ko’zda tutilayotgan qo’shma tadbirlar va hamkorlik istiqbollari muhokama qilindi.

Iqboljon Ergashev mehmonlarga tashrif uchun minnatdorchilik bildirib, Farg’ona viloyati haqida, viloyatning xorijiy davlatlar bilan aloqalari, investitsion salohiyati hamda turli sohalarda erishilgan yutuqlari to’g’risida batafsil ma'lumot berdi.

Kichik biznesni, oilaviy tadbirkorlikni rivojlantirishda o’ziga xos loyiha bo’lgan Uchko’prik tumanidagi “Boboshbek” savdo va ishlab chiqarish majmuasi, bu yerda tayyorlanayotgan tekstil mahsulotlari va eksporti haqida alohida so’z bordi.

O’zaro manfaatli hamkorlik imkoniyatlarini yuqori baholagan MÜSİAD Ozarbayjon bo’linmasi rahbari o’rinbosari Sait Yinanch, ko’plab sohalarda qo’shma loyihalarni amalga oshirishga tayyor ekanliklarini bildirdi.

1990 yilda tashkil etilgan va hozirda 13 mingdan ortiq tadbirkorlik sub'ektlarini o’zida birlashtirgan Turkiya Sanoatchilar va tadbirkorlar mustaqil assotsiatsiyasi – MÜSİAD bugungi kunda dunyoning 80 dan ortiq mamlakatida o’z vakolatxonasiga ega.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram