1. Bosh sahifa

FARG’ONADAGI UZSUNGWOO KORXONASIDA MARKAZIY OSIYODA YAGONA METALLARGA QIZDIRILGAN HOLDA ISHLOV BERISH LINIYASI ISHGA TUSHIRILDI

×

Farg’ona shahridagi Uzsungwoo qo’shma korxonasida Markaziy Osiyoda yagona bo’lgan 10 million dollarlik loyiha qiymatiga ega metallarga qizdirilgan holda ishlov berish liniyasi tantanali tadbir bilan ishga tushirildi.

Eng so’nggi texnologiyalar asosida ishlovchi tsex to’liq avtomatlashgan bo’lib, Schuler, Prima Power, Benteler va Aotto kabi dunyoning eng old mashinasozlik kompaniyalarida ishlab chiqarilgan po’lat o’ramdan kerakli o’lcham olish, qizdirib presslash, lazerda kesish uskunalari o’rnatilgan.

Yangi liniya ishga tushirilishi natijasida korxonaning yillik ishlab chiqarish hajmi 95 million dollarga yetadi. Markaziy Osiyoda yagona ushbu texnologik jarayonning o’zlashtirilishi yurtimizda ishlab chiqarilayotgan Tracker va Onix rusumli avtomobillar uchun 20 turdagi butlovchi qismlarni mahalliylashtirish imkonini ham berdi. Metallarga qizdirilgan holda ishlov berish liniyasida yillik qiymati 19 million dollarlikdan ziyod 2,4 million dona mahsulot ishlab chiqariladi.

Joriy yil boshida amalga oshirishga kirishilgan loyihaning ishga tushishi natijasida 120 ta yangi ish o’rni yaratildi. 

Uzsungwoo MChJ qo’shma korxonasining tashkil etilgan 2012 yildan buyon viloyatimizga kiritgan investitsiyalari hajmi qariyb 60 million dollarga yetdi. O’zbekiston avtomobil sanoatida mustahkam o’ringa ega korxonada 10 yildan buyon yurtimizda ishlab chiqarilayotgan avtomobillar uchun katta va o’rta o’lchamdagi 300 dan ortiq nomdagi shtamp-payvandlangan qismlar ishlab chiqariladi. Korxonada faoliyat yuritayotgan ishchilar soni 900 nafardan oshdi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram