1. Bosh sahifa

BELARUSNING GOMEL VILOYATI RAHBARI KRUPKO BOSHCHILIGIDAGI DELEGATSIYA FARG’ONAGA KELDI

×

Bugun Belarus Respublikasining Gomel viloyati ijroiya qo’mitasi raisi Ivan Krupko boshchiligidagi rasmiylar va ishbilarmonlardan iborat delegatsiya 3 kunlik amaliy tashrif bilan Farg’onaga keldi.

Erta tongda Farg’ona xalqaro aeroportida belaruslik mehmonlarni viloyat hokimining o’rinbosari Xurshidjon Ahmedov, Farg’ona shahar hokimi Vosiljon Nazarov va boshqa rasmiylar tantanali kutib oldilar.

Bugun kun davomida Gomel viloyati delegatsiyasi a'zolari viloyatimizdagi yangi loyihalar hamda yirik ishlab chiqarish korxonalari faoliyati bilan tanishadilar.

Ertaga rasmiy uchrashuvlar doirasida Farg’ona va Gomel viloyatlari rahbarlarining tor va kengaytirilgan doiradagi uchrashuvlari bo’lib o’tadi. Farg’ona viloyati hamda Gomel viloyati o’rtasida o’zaro hamkorlik bo’yicha bitim imzolanadi. Shuningdek, “Qo’qon” erkin iqtisodiy zonasi hamda “Gomel-Raton” erkin iqtisodiy zonasi o’rtasida hamkorlik kelishuvi imzolanishi rejalashtirilgan.

Belarus delegatsiyasi uchun tashrif kunlari Farg’ona shahrida viloyatda ishlab chiqarilgan sanoat va qishloq xo’jaligi mahsulotlari ko’rgazmasi tashkil etiladi. Farg’ona va Gomel viloyatlari ishbilarmon doiralari vakillari o’rtasida B2B uchrashuvlar bo’lib o’tadi. Muzokaralar yakuni bo’yicha kelishuv va shartnomalar imzolanishi ko’zda tutilgan.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram