Farg'ona viloyati hokimi
Hayrullo Hayitbayevich Bozarov
Oilaviy tadbirkorlikni rivojlantirish maqsadida ajratiladigan imtiyozli kredit hisobidan fuqarolarga mahsulot yetkazib beruvchi ta'minotchi korxonalarning ro'yxati
.
.
Farg'ona viloyati investitsion salohiyati
Saytni baholash
ELDA E’ZOZ TOPGAN USTOZ
2017-10-05 09:52:18 94
Prezidentimizning 2017 yil 27 sentyabrdagi “O’qituvchi va murabbiylar kuni munosabati bilan ta’lim-tarbiya tizimida alohida o’rnak ko’rsatgan xodimlardan bir guruhini mukofotlash to’g’risida”gi Farmoniga muvofiq, davlatimizning yuksak mukofotlari bilan taqdirlangan yurtdoshlarimiz orasida Toshloq tumanidagi 1-ixtisoslashtirilgan umumiy o’rta ta’lim maktab-internatining fizika fani o’qituvchisi Ikromjon Marahimov ham bor. Ustoz muallim «O’zbekiston Respublikasida xizmat ko’rsatgan xalq ta’limi xodimi» faxriy unvoni bilan taqdirlandi.
I. Marahimov fizika fani bo’yicha viloyatimizda ko’zga ko’ringan mutaxassislardan. Muallim yangi pedagogik texnologiyalardan foydalangan holda o’quvchilarga chuqur bilim berib kelmoqda. Aniq fanlarga ixtisoslashgan mazkur ta’lim maskanida fizika fanini o’qitishda o’ziga xos maktab yaratilgan. Bunda albatta ustozning xizmati beqiyos. Mana, 35 yildirki, I. Marahimov doimo izlanishda.
Ustoz tomonidan 50 dan ziyod o’quv-metodik qo’llanmalar va elektron dars ishlanmalari, yuzdan ortiq ko’rgazmali vositalar ishlab chiqilgan. 2013-2016 yillarda uning «Fizika darslarida masalalar echishda geometriya qoidalaridan foydalanish», «Fizika darslarida ko’rgazma vositalari sifatida mahalliy materiallardan foydalanish» kabi mavzularidagi uslubiy qo’llanmalari viloyat miqyosida ommalashtirilgan.
I. Marahimovning o’quvchilari fizika fanidan har yili bilimlar bellashuvi va fanlar olimpidasida viloyatda faxrli o’rinlarni qo’lga kiritib kelmoqda. E’tiborli jihati, bugungi kunda u o’qitgan o’quvchilar orasida 25 nafari fizika fani o’qituvchisi kasbini tanlab, ta’lim maskanlarida mehnat qilmoqda. Ustoz 2006 yilda “Shuhrat” medali bilan taqdirlangan.
...Ikromjon Marahimovning «O’zbekiston Respublikasida xizmat ko’rsatgan xalq ta’limi xodimi» faxriy unvoni bilan taqdirlangani haqidagi xushxabar bir zumda butun viloyatga yoyildi. Muallimning Zarkent qishlog’idagi mo’’jazgina hovlisi farzandlari, hamkasblari, sobiq o’quvchilari, shogirdlari, qo’ni-qo’shni, mahalla-kuy, uzoq-yaqindan kelgan mehmonlar bilan to’ldi. Pedagog mehnatining bunday yuksak sharaflangani har bir mehmonning ko’nglini tog’dek ko’tardi. Ta’limga e’tibor – millat kelajagiga e’tibor ekanini barcha yakdillik bilan ta’kidladi.
Ha, bu yuksak faxriy unvon Ikromjon Marahimov yaratgan va o’z mehnati bilan parvarishlab kelayotgan saxovatli bog’ning totli mevasidir.
