Farg'ona viloyati hokimi
Hayrullo Hayitbayevich Bozarov
Oilaviy tadbirkorlikni rivojlantirish maqsadida ajratiladigan imtiyozli kredit hisobidan fuqarolarga mahsulot yetkazib beruvchi ta'minotchi korxonalarning ro'yxati
.
.
Saytni baholash
Kuz-qish mavsumi: MAS’ULIYATNI OSHIRISH ZARUR
2017-12-19 11:43:23 87
O’zbekiston Respublikasi Prezidentining 2017 yil 22 iyundagi “Respublika iqtisodiyoti tarmoqlari va ijtimoiy sohalarini 2017-2018 yillar kuz-qish davrida barqaror ishlashga kompleks tayyorlashni ta’minlash chora-tadbirlari to’g`risida”gi qaror ijrosini ta’minlash maqsadida viloyat hokimining shu yil 29 iyunda qarori qabul qilindi. Qarorda aholini, ko’p qavatli uylarni, umumiy foydalanish joylarini, iqtisodiyot tarmoqlari va ijtimoiy soha ob’ektlarini yoqilg`i-energetika resurslari bilan o’z vaqtida va etarli darajada ta’minlash, elektr va gaz ta’minoti ob’ektlari hamda ko’mir tarmoqlari korxonalarini kuz-qish davrida barqaror ishlashga tayyorlash ishlarini tashkillash belgilangan.
Ammo oradan besh oy o’tganiga qaramay ba’zi joylarda qaror ijrosini ta’minlashga loqaydlik bilan qarab kelingan. O’zbekiston Respublikasi Prezidenti devoni ishchi guruhi tomonidan joriy yilning 4-5 dekabr kunlari Farg`ona viloyati shahar-tumanlarida joylashgan 128 ta maktab va 116 ta maktabgacha ta’lim muassasalarining 2017-2018 yillar kuz-qish mavsumiga tayyorgarlik holati o’rganildi. Jumladan, muassasalarni isitishdagi, tom qismidagi kamchiliklari bartaraf etilmaganligi, ko’mir yoqilg`isi belgilangan tartibda saqlanmaganligi hamda sanitariya talablariga javob bermaydigan xonalarda tarbiyalanuvchilarga ovqat tayyorlash holatlari mavjud.
Qo’qon shahridagi 31-maktabgacha ta’lim muassasasining oshxonasi, yuvinish, isitish moslamasi orqali xonalar isitilishini ko’rib, hayratlanasiz. Chunki bolalar yotoqxonasining bir chekkasiga pechka o’rnatilib, ko’mir bilan isitilmoqda. Ammo pechkaning atrofi o’ralmagan. Bironta bola unga tegib, kuyib qolmasligiga kim kafolat beradi? Xonalarning isitish harorati etarli darajada emas.
Toshloq tumanidagi 7-maktabda ham noxush holatga duch kelindi. Maktab zinalari ko’chib ketgan, tom devorlari tushib, tomdan chakka o’tadi. Direktor, pedagogik jamoa bunday holatni ko’rib ko’rmaslikka olib, ko’z yumib kelishmoqda. O’quv maskani nihoyatda achinarli holatda. To’rtta sektor mas’ullari bu ishni qattiq nazoratga olishlari talab etiladi.
O’zbekiston tumanidagi 45- MTM, Farg`ona shahridagi 22-maktab, Farg`ona tumanidagi 50-maktab, Beshariq tumanidagi 6-davlat ko’p tarmoqli maktabgacha ta’lim muassasasi, Quvasoy shahar, Bag`dod tumani va boshqa tumanlardagi maktab, maktabgacha ta’lim muassasalarida ham yuqoridagi holatlarga yo’l qo’yilgan.
Farg`ona shahridagi Ibn Sino nomli MFY hududidagi 123 ta ko’p qavatli uylardagi mavjud 1312 ta xonadonlarga 5 ta xususiy uy-joy mulkdorlari shirkatlari texnik xizmat ko’rsatib kelmoqda. I.Shumixina rahbarligidagi “Fergana Feniks invest” xususiy uy-joy mulkdorlari shirkatida 8 ta ko’p qavatli uy mavjud. Shu kunga qadar Yangi asr ko’chasidagi 154, 158, 168-uylar mavsumga tayyor emas. Ushbu uylarning tik isitish quvurlari ma’naviy eskirgan, ularni yangisiga almashtirish talab etiladi. “Madina bonu” xususiy uy-joy mulkdorlari shirkati texnik xizmat ko’rsatayotgan 176, 194-uylar, shuningdek, Tanzila Karimova boshqarib kelayotgan “Al-Maqsud-Mirzo” xususiy uy-joy mulkdorlari shirkatidagi 192-uyda boshlangan mavsumoldi ishlari ma’lum sabablarga ko’ra to’xtab qolgan. Uchala shirkat raislari bu boradagi ishlarning to’xtab qolishiga “Xalq banki” Qirguli bo’limi tomonidan ajratilishi rejalashtirilgan kredit mablag`larining shirkatlar hisob raqamiga o’z vaqtida o’tkazib berilmayotganligi bilan izohlashdi. Shirkatlar rahbarlari bilan suhbatdan shu narsa ma’lum bo’ldiki, ularni bir muammo–ko’p qavatli uylarda yashab kelayotgan mulkdorlar tomonidan belgilangan majburiy badallarning o’z vaqtida to’lanmayotgani qiynamoqda va bu muammo shirkatlar faoliyatiga salbiy ta’sir ko’rsatmoqda.
Yuqorida nomlari keltirilgan xususiy uy-joy mulkdorlari shirkatlari raislarining mulkdorlar bilan ishlashda o’z huquq va vakolatlaridan to’liq foydalana olmayotganliklari ma’lum bo’ldi. Avvalo, har bir shirkat raisi o’z hududida mamlakatimizda olib borilayotgan islohotlar targ`ibotchisi, ularning oldingi safdagi ishtirokchisi bo’lishi kerak emasmi? Ustiga-ustak, mulkdorlar bilan etarlicha muloqotning yo’qligi, zarur hollarda ular bilan yakka tartibda ishlash mexanizmining yaratilmaganligi tufayli o’rtada ishonch va hurmat yo’qolgan. Axir shirkat boshqaruvi xodimlari nizomga ko’ra, mulkdorlar bilan tez-tez uchrashib va yig`ilishlar o’tkazib, har bir xonadon egasini sohada olib borilayotgan islohot va yangiliklardan o’z vaqtida xabardor qilib borishi kerak emasmi? O’zaro muloqotning to’g`ri va qonuniy yo’lga qo’yilmaganligi sababli yuqoridagi kabi o’zibo’larchilik holatlari yuzaga chiqmoqda.
Hozirgi paytda hech bir ish o’z-o’zidan bajarilib qolmaydi. “Olma pish, og`zimga tush” deb kutib yashaydigan zamonlar o’tib ketdi. Yashab turgan xonadonlarimizga texnik xizmat ko’rsatishdan tashqari, uylarimiz atrofidagi obodonchilik va ko’kalamzorlashtirish ishlari mablag` talab qiladi va ushbu mablag`lar siz va bizning shirkatga to’layotgan majburiy badallarimiz hisobidan shakllanadi. Qolaversa har birimiz o’z uyimizni o’zimiz asrashimiz, uning xavfsizligi, tozaligi va hududdagi saranjom-sarishtalik uchun birdek javobgar ekanligimizni unutmaylik!
Matluba SALIMOVA.
"Farg`ona haqiqati" muxbiri