1. Бош сахифа

ФАРҒОНАДА ХОНАДОНЛАРГА ҚУЁШ ПАНЕЛЛАРИ ЎРНАТИЛМОҚДА

×

Келгуси авлодлар учун табиий бойликларни сақлаб қолиш ва экологияни муҳофаза қилишнинг зарурий шарти қайта тикланадиган ва муқобил энергия манбаларини ўзлаштириш ҳисобланади. Шу сабаб жорий йилнинг 10 июнь куни Президентимиз раислигида иқтисодиёт тармоқлари, аҳоли ва ижтимоий соҳа объектларида қайта тикланувчи энергия манбаларидан кенг фойдаланиш чора-тадбирларига бағишланган видеоселекторда берилган топшириқлар ижросини таъминлаш мақсадида Фарғона туманидаги “Миндонобод” ва “Новкент”, Ёзёвон туманидаги “Қотортол”, Қўштепа туманидаги “Ўқчи” маҳалла фуқаролар йиғинларида жойлашган хонадонлар қуёш панеллари ўрнатиш учун танлаб олинди.

“Фарғона ҳудудий электр тармоқлари корхонаси” АЖ ҳамда Фарғона, Қўштепа, Ёзёвон туманлари ҳокимликлари ҳамкорлигида амалий жараёнлар бошланди. 

Жумладан, дастлабки босқичда Фарғона тумани “Новкент” МФЙ ҳудудидаги мавжуд 426 та хонадоннинг 108 тасига қуёш панелларини ўрнатиш ишлари якунланмоқда. 2-босқичда эса 426 та хонадонга тўлиқ қуёш панеллари ўрнатилади. 

Бундан ташқари, туманнинг “Миндонобод” МФЙ ҳудудида ҳам 862 та хонадон мавжуд бўлиб, шундан дастлабки босқичда 290 та хонадонга қуёш панелларини ўрнатиш режалаштирилган.

Натижада бу икки ҳудудда қарийб 82-85 фоиз электр энергияси истеъмолини тежашга эришилади. Эътиборлиси, қуёш панеллари ўрнатилган хонадонларга солиқ имтиёзлари берилиши ҳам кўзда тутилган.

Амалий ишлар билан бир қаторда бугунги кунда вилоятимиз бўйлаб аҳоли ва ижтимоий соҳа объектларида қайта тикланувчи энергия манбаларидан кенг фойдаланишлари бўйича тушунтириш-тарғибот тадбирлари олиб борилмоқда.

“Фарғона ҲЭТК” АЖ ахборот хизмати

Бизни ижтимоий тармоқларда кузатинг
Facebook, Telegram, Facebook, YouTube, Instagram