1. Бош сахифа

ВИЛОЯТ ҲОКИМЛИГИДА АҚШНИНГ ЎЗБЕКИСТОНДАГИ ЭЛЧИСИ ЖОНАТАН ХЕНИК БИЛАН УЧРАШУВ БЎЛИБ ЎТДИ

×

Вилоят ҳокими Хайрулло Бозоров вилоят ҳокимлиги қабуллар уйида АҚШнинг Ўзбекистондаги Фавқулодда ва мухтор элчиси Жонатан Хеник билан учрашди.

Учрашувда Фарғона вилояти ва АҚШ штатлари ўртасида ўзаро савдо ва иқтисодий алоқаларни кенгайтириш, ижтимоий-маданий соҳаларда ҳамкорликни йўлга қўйиш масалалари муҳокама қилинди.

Бугунги кунда икки томонлама алоқалар янги босқичга кўтарилаётгани, сўнгги бир йил давомида АҚШ бозорига Фарғонадан Риштон кулолчилик маҳсулотлари ҳамда Олтиариқ узумлари кириб боргани учрашув давомида алоҳида қайд этилди, бу борада катта имкониятлар мавжудлиги эътироф этилди.

Жорий йил 24 январь куни Вашингтонда Фарғона вилояти ҳокимлиги ва Ўзбекистоннинг АҚШдаги элчихонаси ҳамкорлигида ташкил этилган “Риштон керамикаси: Марказий Осиё кулолчилик санъатининг гавҳари” номли кўргазма ҳамда Элчихона қошидаги доимий кулолчилик шоурумининг очилиши ўзаро ҳамкорликни ривожлантиришда муҳим қадам бўлгани таъкидланди.

Ушбу кўргазма Фарғона ҳунармандчилигига АҚШда катта қизиқиш мавжудлигини кўрсатгани инобатга олиниб, ҳозирда вилоятимиз туризм компаниялари томонидан америкалик туристлар учун Риштон ва Марғилонга ҳунармандчилик туризми йўналишлари ташкил этиш борасида иш олиб борилаётгани маълум қилинди.

Фарғона билан АҚШ ҳудудлари ҳамкорлик алоқаларини янада ривожлантириш, Фарғона вилояти ҳамда Калифорния ва Юта штатлари ўртасида биродарлашув алоқаларини ўрнатиш, АҚШ инвестицияларини вилоят иқтисодиётига жалб этиш кўламини кенгайтириш, касбий таълим йўналишида ҳамкорлик қилиш борасида иш ташкил этишга келишиб олинди.

АҚШ элчихонаси вакиллари вилоятимизга ташриф давомида қишлоқ хўжалиги маҳсулотлари экспорти билан шуғулланувчи “Uz-Segang” агрологистика комплекси, “Fergana Global Textile Infinity” кластери, Марғилон шаҳридаги “Ёдгорлик” марказини ҳамда қатор ижтимоий соҳа объектларида ҳам бўлиши режалаштирилган.

Бизни ижтимоий тармоқларда кузатинг
Facebook, Telegram, Facebook, YouTube, Instagram