1. Bosh sahifa

Farg'ona viloyati hokimligi Axborot xizmatining BAYONOTI

×

Joriy yilning 2 dekabr kuni Farg'ona viloyati hokimi tomonidan o'tkazilgan selektorda yashirincha yozib olingan audio ijtimoiy tarmoqlarda tarqalib, muhokamalarga sabab bo'ldi. Shuni ma'lum qilamizki, Quva tumani va boshqa hududlarda aholining elektr-energiyasi va gaz taqchilligi bo'yicha bildirgan noroziliklari, bu boradagi muammolar hukumatimiz va viloyat hokimligi tomonidan zudlik bilan nazoratga olinib, amaliy hal etish choralari ko'rildi. Bugungi kunda viloyatda aholiga uzluksiz va cheklovlarsiz elektr-energiyasi, tabiiy gaz etkazib berishga harakat qilinmoqda.

Viloyat hokimining o'zi kechasiyu kunduz bu ishlarning boshida turib, mahalliy hokimliklar va mutasaddi tashkilotlar bilan ish olib bormoqda. Audiodan ham ko'rinadiki, viloyat rahbari hech kimga nisbatan haqarotomuz so'z ishlatmagan. Mas'ul rahbarlarga tanbeh bergan. Shuningdek, ijtimoiy tarmoqlarga norozi bo'lib murojaat qilgan fuqarolarga hech qanday bosim o'tkazilmaganligini ham eslatib o'tmoqchimiz.

Bugungi kunda elektr-energiyasi va tabiiy gazdan oqilona foydalanish barchaning muhim vazifasidir. Ayni kunlarda joylarda bu yo'nalishda ham targ'ibot ishlari olib borilmoqda. Ro'y berayotgan voqealarning har birini viloyat hokimi nomiga bog'lamaslikni so'rab qolamiz. Shu o'rinda aytish kerakki, “Ozodlik”ka jar solguncha o'z yurtimiz, xalqimiz, oila va bola-chaqalarimiz uchun naf tegadigan xayrli amal bilan shug'ullansak yaxshi emasmi! Vatanni tanimaslar bizga nima qilib berardi, o'ziga tayin yurt qilolmaganlar xalqqa asqotarmidi. Har bir insonni u kim bo'lishidan qat'iy nazar borida qadriga etishni ham bilaylik. Birdamlik, ahillik va maslahat bilan yurtimizga, xonadonimizga fayz va baraka tilaylik!