Farg‘ona viloyati tarixi va madaniyati davlat muzeyi

Farg‘ona viloyati tarixi va madaniyati davlat muzeyi zahiraxonalarida vodiy tarixining barcha davriga mansub buyumlarning boy kolleksiyasi yig‘ilgan. Umumiy hisobda muzey eksponatlarining soni 90 ming donadan ortiq. Mazkur muzey O‘zbekistondagi eng keksa muzeylardan biridir. Unga 1894-yilning kuzida Yangi Marg‘ilon (hozirgi Farg‘ona) shahrida bo‘lib o‘tgan qishloq xo‘jaligi va sanoat ko‘rgazmasi asos bo‘lgan. Oradan bir yil o‘tib, 1895-yil 2-noyabrda Farg‘ona viloyat harbiy gubernatorining buyrug‘iga ko‘ra, gubernator uyining ikkinchi qavatidan to‘rtta xona muzey uchun ajratib berildi. Bugungi kunda Farg‘ona viloyati tarixi va madaniyati davlat muzeyi barcha turdagi zamonaviy texnika vositalari bilan ta’minlangan bo‘lib, ular ilmiy-tadqiqot ishlarida katta samara bermoqda. Muzey xodimlari tomonidan qator monografiyalar nashrdan chiqarildi. Muzeyning katta ilmiy xodimi G. P. Ivanov O‘z. R. FA. Arxeologiya instituti bilan hamkorlikda «Ahmad al-Farg‘oniy davrida Quva shahri» nomli monografiyasini ikki tilda (o‘zbek va ingliz tillari) nashr ettirdi. N. Abdulahatov «Ahmad al-Farg‘oniy», «Mo‘yi muborak» va «Burhoniddin al-Marg‘inoniy davri va uning avlodlari» nomli qator risolalarni nashrdan chiqarib, keng jamoatchilik orasida e’tibor qozondi. Ayniqsa G. P. Ivanovlarning hammualliflikda uchta tilda chiqargan “Farg‘ona viloyat o‘lkashunoslik muzeyi” nomli rangli katalog muzeyda muhim hodisa bo‘ldi. Bulardan tashqari har yili Farg‘ona muzeyi xodimlarining ilmiy va ilmiy-ommabop maqolalari chet el va Respublikamiz ilmiy nashrlarida e’lon qilib boriladi.