Prezidentimizning tegishli qaroriga asosan, Marg‘ilon shahar bolalar shifoxonasida 11 mlrd 900 mln. so‘mdan ziyod mablag‘ evaziga ta‘mirlash ishlari bajarildi.

Mazkur tibbiyot muassasasi 1980 yilda faoliyat boshlagan bo‘lib, 3 qavatdan iborat binolarda joylashgan. Shifoxonaning barcha bo‘limlari binolari mukammal ta‘mirdan chiqarilib, qo‘shimcha ravishda 2 qavatdan iborat yangi operasiya bo‘limi hamda ma‘muriy bino barpo etildi. Aholiga sifatli tibbiy xizmat ko‘rsatish uchun barcha shart-sharoitlar yaratildi.

Bolalar shifoxonasini foydalanishga topshirish marosimida viloyat sog‘liqni saqlash boshqarmasi mas‘ullari, tibbiyot xodimlari va keng jamoatchilik vakillari ishtirok etdi.

So‘z olganlar davlatimiz rahbari tomonidan sog‘liqni saqlash tizimiga, aholi sog‘lom turmush tarzini shakllantirishga qaratilayotgan katta e‘tibor haqida to‘xtalib o‘tdilar. Muassasa xodimlari va aholi vakillari yaratilgan qulayliklar uchun minnatdorlik bildirdilar.

Ramziy tasma qirqilib, tadbir qatnashchilari bu erdagi shart-sharoitlar bilan yaqindan tanishdilar.