Shu munosabat bilan tashkil etilgan tadbirda viloyat hokimi, harbiy-ma‘muriy sektor rahbari Xayrullo Bozorov, Sharqiy harbiy okrug qo‘shinlari qo‘mondoni, general-mayor Oybek Saidov, harbiy xizmatchilar, faxriylar va keng jamoatchilik vakillari ishtirok etdi.

Tadbirda so‘z olgan viloyat hokimi Qurolli kuchlar tizimida amalga oshirilayotgan islohotlar, harbiy-ma‘muriy sektor faoliyati haqida so‘z yuritib, bugungi kunda yoshlarni harbiy- vatanparvarlik ruhida tarbiyalash muhim vazifa ekanligini, bunda armiya muhim o‘rin tutishligini bildirdi. "Jasorat maktabi" harbiy-o‘quv yig‘inida ishtirok etadigan yoshlar uchun yaratilgan sharoitlar ularni har tomonlama chiniqtirishga, hayotni o‘rgatishga xizmat qilishini ta‘kidladi.

- Bu yerda bo‘lib, armiyani o‘z ko‘zi bilan ko‘rgan har bir yoshda albatta, vatanga, oilaga bo‘lgan mehr paydo bo‘ladi, - dedi viloyat rahbari.

Mazkur obyektda “Grand global gigant servis” MChJ tomonidan mukammal ta‘mirlash ishlari bajarilib, buning uchun 1 mlrd 675 mln. so‘m mablag‘ yo‘naltirildi. Birinchi qavatda 100 o‘ringa mo‘ljallangan o‘quv sinflari, ikkinchi qavatda esa askarlar uchun yotoqxona va maishiy xizmat ko‘rsatish xonasi tashkil etildi.

Sharqiy harbiy okrug qo‘shinlarining “Farg‘ona” dala-o‘quv maydoni hududida zamon talablari darajasida qurilgan yangi oshxona harbiy xizmatchilar uchun munosib tuhfa bo‘ldi. Tadbirda so‘zga chiqqanlar tomonidan bu alohida e‘tirof etildi.

“Taraqqiyot qurilish montaj” MChJ tomonidan 2 mlrd 179 mln. so‘m mablag‘ hisobiga mukammal ta‘mirlash, hududni obodonlashtirish ishlari amalga oshirildi.

Oshxonada oziq-ovqat mahsulotlarini saqlash va ishlov berishga mo‘ljallangan alohida xonalar tashkil etilib, zamonaviy texnologik jihozlar bilan ta‘minlandi. Ozoda va shinam maskan harbiy qismda xizmat qilayotgan harbiylar uchun nafaqat qulaylik, balki ularga ruhiy-ma‘naviy ko‘tarinkilik ulashishda ham muhim ahamiyat kasb etadi.

Ramziy lenta qirqilib, tadbir ishtirokchilari harbiylar uchun yaratilgan shart-sharoitlar bilan yaqindan tanishdilar. Duolar qilinib, yurtga tinchlik, elga farovonlik tiladilar.