O‘zbekiston Respublikasi Vazirlar Mahkamasining topshirig‘iga muvofiq, mamlakatimiz bo‘ylab turizm ob‘ektlari, aeroportlar, vokzallar, avtoshohbekatlar hamda avtomobillarga yoqilg‘i quyish shoxobchalarida sanitariya-gigiena sharoitlari, shaharsozlik normalari va qoidalariga muvofiqligi kabi masalalar o‘rganilmoqda. Shu maqsadda Respublika ishchi guruhi Farg‘ona viloyatida o‘z faoliyatini boshladi. Dastlab, Respublika, viloyat hamda hududiy ishchi guruhning a‘zolari ishtirokida yig‘ilish o‘tkazildi. Unda turizm ob‘ektlarida yaratilgan sharoitlarning sanitariya, shaharsozlik normalari va qoidalariga mosligi, shuningdek, nogironligi bo‘lgan shaxslar uchun qulayliklar yaratish masalalari atroflicha muhokama qilindi. Yig‘ilishda Respublika ishchi guruhi rahbari M.Hayitova, viloyat hokimi o‘rinbosarlari X.Ahmedov va Sh.Polvonov, shuningdek, tegishli tashkilot va idoralar rahbarlari ishtirok etdilar. Mazkur o‘rganish natijalari asosida viloyatda mavjud ob‘ektlarning holati tahlil qilinib, sanitariya-gigiena talablari hamda inklyuziv sharoitlarni yanada yaxshilash bo‘yicha takliflar ishlab chiqiladi.