Viloyat hokimi Xayrullo Bozorov Turkiyaning “Heyal Holding” kompaniyasi ta‘sischisi Vaxdettin Xeyal boshchiligidagi ishbilarmonlar delegasiyasini qabul qildi. Uchrashuvda sanoat zonasini tashkil etish va unga istiqbolli loyihalarni joylashtirish hamda zargarlik korxonasini ochish masalalari muhokama qilindi. Viloyat rahbari Farg‘onaning investision va iqtisodiy salohiyati haqida so‘z yuritib, turkiyalik investorlar bilan hamkorlikda ko‘plab yirik loyihalar amalga oshirilayotganini ta‘kidladi. Turkiyalik ishbilarmonlar Quva tumanida ilg‘or tajribalar asosida sanoat zonasini tashkil etish, turli yo‘nalishlarda loyihalarni joylashtirish, shuningdek, Farg‘ona shahrida zargarlik korxonasi va ushbu soha uchun o‘quv markazi faoliyatini yo‘lga qo‘yishni rejalashtirmoqda. Muloqotda takliflar atroflicha muhokama qilinib, viloyat hokimi turkiyalik investorlarning tashabbuslarini to‘liq qo‘llab-quvvatlashini bildirdi. Uchrashuv yakunida loyihalarni amalga oshirish bo‘yicha hamkorlikdagi aniq chora-tadbirlar belgilab olindi.