Qo‘shtepa tumanida chilgi hosil - ipak qurti urug‘larini inkubatoriya sharoitida jonlantirish mavsumi boshlandi.

Joriy yilda bu erda 2423 quti ipak qurti urug‘lari parvarishlanib, 145 tonnadan ortiq qimmatbaho sanoat xom ashyosi yetishtiriladi. Pillachilik agronomi Hoshimjon Sobirov bosh bo‘lgan, 3-sonli inkubatoriyada 170 quti ipak qurti urug‘i jonlantirilyapti.

“Qo‘shtepa agropilla” MChJ hamda “Sof ipak tola” pillachilik klasteri tomonidan ipak qurti urug‘larini yangi texnologiyalar asosida parvarishlash va aholi bandligini ta‘minlash ishlariga alohida e‘tibor qaratilmoqda. Shu kunga qadar, ishsizligi sabab “Ayollar daftari”ga kirgan 1500 nafar xotin-qizlar kasanachilik asosida ish bilan ta‘minlandi. Ular pilla yetishtirib, daromad olish bilan birga, bir yillik mehnat stajiga ham ega bo‘lishadi.

Bu yil Farg‘ona viloyatida 46 ming 436 quti ipak qurti urug‘lari parvarishlanib, 2 ming 786 tonna tirik pilla terib olinadi. Shu maqsadda, 4 ming 252 ta fermer xo‘jaliklari hamda 13 ming 755 nafar kasanachilar bilan belgilangan tartibda shartnomalar tuzildi. Mavsumni uyushqoqlik bilan tashkil etish maqsadida agronomlar va pillachilik xodimlari, 52 ming nafardan ziyod ayollarning bilim va ko‘nikmalari oshirildi.

Pillachilik klasterlari tomonidan mavsum uchun kerakli bo‘lgan to‘shama qozog‘lar, termometr va boshqa kerakli ashyolar yetkazib berilyapti.