Вилоят ҳокими Хайрулло Бозоров бошчилигидаги Фарғона вилояти расмийлари ва ишбилармонларидан иборат делегация амалий ташриф билан Хитой Халқ Республикасида бўлиб турибди.

Вилоят делегацияси дастлаб Шинжон-Уйғур автоном районида бўлиб, қатор учрашувлар ўтказди. Унда Ўзбекистоннинг Хитойдаги Фавқулодда ва мухтор элчиси Фарҳод Арзиев иштирок этди.

Урумчи шаҳрида Хитой Коммунистик партияси Марказий қўмитаси Сиёсий бюроси аъзоси, Шинжон-Уйғур автоном райони Партқўми котиби Ма Синжуй бошчилигидаги расмийлар билан кенг доирада ўтказилган музокараларда икки ҳудуд ўртасида тўғридан-тўғри ҳамкорлик алоқаларини ривожлантириш истиқболлари муҳокама қилинди.

Учрашувда бугунги кунда Ўзбекистон ва Хитой муносабатлари янги даврга, сифат жиҳатдан янги босқичга чиққанлиги, бунда Ўзбекистон Республикаси Президенти Шавкат Мирзиёев ва Хитой Халқ Республикаси Раиси Си Цзиньпин ўртасидаги яқин, самимий ва биродарлик ришталари муҳим аҳамият касб этаётгани таъкидланди. Барча соҳаларда ҳамкорлик мустаҳкамланиб бораётгани, Хитой–Қирғизистон–Ўзбекистон янги магистрал темир йўли қурилиши бошлангани муҳим тарихий воқеа бўлганлиги, ҳудудлараро алоқалар фаоллашгани қайд этилиб, Шинжон- Уйғур автоном райони ва Ўзбекистон ўртасидаги самарали ҳамкорлик эътироф қилинди. Фарғона вилояти ва Шинжон билан ҳам тўғридан-тўғри кўплаб соҳаларда ҳамкорликни ривожлантириш таклифлари билдирилди.

Вилоят ҳокими Хайрулло Бозоров икки давлат ҳудудлари ўртасидаги ҳамкорлик стратегик шерикликнинг самарали механизмига айланганлигини қайд этиб, Фарғонанинг улкан иқтисодий-инвестициявий имкониятлари ҳақида маълумот берди. Қишлоқ хўжалиги, текстил-тўқимачилик, туризм, электротехника, фармацевтика, қурилиш материаллари ишлаб чиқариш, таълим каби йўналишларда ҳамкорликни ривожлантириш бўйича таклифлар билдирилди. Хусусан, Шинжоннинг қишлоқ хўжалигини барча йўналишларидаги илғор тажрибалари ва технологияларни вилоятимизда жорий этиш, ҳамкорликда соҳанинг малакали мутахассисларини тайёрловчи илмий-амалий марказ ташкил этиш ва ўзаро алмашинувларни, олий ўқув юртлари билан алоқаларни йўлга қўйиш, Уруғчилик маркази, Қува туманида мевали ва манзарали кўчатчилик марказини очиш илгари сурилди. Шунингдек, туризм, текстиль, минерал ўғитлар ишлаб чиқариш, машинасозлик каби йўналишларда лойиҳаларни амалга ошириш, икки ҳудуд Савдо-саноат палаталарининг уюшмасини ташкил қилиш билдирилди.

Вилоят ҳокимининг биринчи ўринбосари Мирзоҳид Убайдуллаев бошчилигидаги ишчи гуруҳни туризм борасида Қошғар тажрибасини ўрганиш ҳамда ҳудудлар ўртасида туризм ҳалқасини ташкил этишга келишилди.

Музокаралар якунида билдирилган таклифлар ва масалалар бўйича дастлабки келишувларга эришилиб, уни амалга ошириш чора-тадбирлари белгиланди.