Shandun provinsiyasidagi Tayan yuqori texnologiyali sanoatni rivojlantirish zonasida joylashgan “Shandong Huihai Electrical Co., Ltd" kompaniyasi Farg‘ona viloyatida yangi korxona ochadi. Xitoyda amaliy tashrif bilan bo‘lib turgan viloyat hokimi Xayrullo Bozorov boshchiligidagi viloyat delegatsiyasi bugun mazkur kompaniyada bo‘lib, investitsiyaviy loyihani amalga oshirishga kelishildi.

“Shandong Huihai Electrical Co., Ltd" kompaniyasi ko‘plab turdagi transformatorlar va elektr jihozlari ishlab chiqarishga ixtisoslashgan. Energiya tizimidagi yo‘qotishlarni kamaytirish, xarajatlarni qisqartirish va samaradorlikda bu zamonaviy jihozlarning ahamiyati katta.

Viloyat delegatsiyasi dastlab kompaniya faoliyati bilan tanishdilar. Uchrashuvda esa viloyatimizda innovatsion transformatorlar va elektr jihozlari ishlab chiqarish loyihasini amalga oshirish muhokama qilindi.

Viloyat hokimi energetika tizimida so‘nggi yillarda olib borilayotgan modernizatsiya jarayonlarini qayd etib, bunda tizimga "aqlli" texnologiyalarni joriy qilish muhimligini ta‘kidladi. Loyihani maxsus sanoat zonasiga joylashtirish, investorlarni qo‘llab-quvvatlash bildirildi.

Kompaniya rahbari Si Yanji Farg‘onaga borib, imkoniyatlar bilan tanishgani, korxonani ochish uchun dastlabki ishlarga kirishilganligini, zamonaviy texnologiyalarni o‘rnatilishini ma‘lum qildi.

Uchrashuvda kompaniya bilan hamkorlik shartnomasi imzolandi.