Farg‘ona viloyati delegatsiyasi Szinan shahrida joylashgan “Inspur Group Co., Ltd” kompaniyasida bo‘lib, uning faoliyati bilan tanishdi.

Inspur Xitoyning eng yirik axborot texnologiyalari kompaniyalaridan biri bo‘lib, aqlli shaharlar, raqamli infratuzilma va transport tizimlari uchun ilg‘or yechimlarni ishlab chiqish va joriy etish bo‘yicha 30 yildan ortiq tajribaga ega. Bugungi kunda kompaniya mahsulotlari dunyoning 120 dan ortiq mamlakatlarida ishlamoqda.

Kompaniyaning asosiy faoliyati kompyuter serverlari va dasturiy ta‘minot ishlab chiqarish, ma‘lumotlar markazlarini yaratish va bulutli hisoblashdan iborat. Kompaniyada 35 mingdan ortiq xodim ishlaydi. O‘tgan yilda tashqi bozordagi ulushi 400 barobarga oshdi.

U Xitoyda 1-raqamli server ishlab chiqaruvchisi va dunyodagi eng yirik beshta server yetkazib beruvchilaridan biri hisoblanadi. Kompaniyaning zavodlari Xitoy va Venesuelada joylashgan. AQSh va Yaponiya kompaniyalari uchun buyurtmalarni ham bajaradi.

Kompaniya rahbarlari tomonidan shular xususida batafsil ma‘lumotlar berildi.

Kompaniyaning vitse-prezidenti David Vei boshchiligidagi rasmiylar bilan uchrashuv bo‘lib o‘tdi.

Viloyat hokimi Xayrullo Bozorov kompaniya rasmiylari bilan uchrashuvda bugungi kunda axborot texnologiyalari barcha sohalarda keng qo‘llanilayotgani, mamlakatimizda amalga oshirilayotgan raqamlashtirish borasidagi ishlar haqida so‘z yuritildi. Kompaniya bilan qishloq xo‘jaligi, suv tizimini "aqlli" boshqarish bo‘yicha hamkorlik qilish taklifini bildirdi.

Uchrashuvda viloyat hokimligi va kompaniya o‘rtasida hamkorlik shartnomasi imzolanib, loyihani boshlashga kelishib olindi.