Nozimjon Shavkatjonov Parijda o‘tkazilgan nufuzli Xalqaro Fizika olimpiadasida ishtirok etib, bronza medalini qo‘lga kiritdi Dang‘ara tumanidagi 1-sonli ayrim fanlar chuqur o‘qitiladigan sinflari mavjud umumiy o‘rta ta‘lim maktab-internati o‘quvchisi Shavkatjon ikki yildan buyon Fizika fanidan O‘zbekiston terma jamoasi a‘zosi. U joriy yil 17-23 iyulь kunlari Fransiyaning Parij shahrida 55-marotaba o‘tkazilgan, dunyoning 90 dan ortiq mamlakatidan kelgan eng iqtidorli yosh fiziklar qatnashgan Xalqaro Fizika olimpiadasida (IPhO) bronza medalini qo‘lga kiritdi. Fan olimpiadasining Respublika bosqichida fizika fanidan faxrli 1-o‘rinni egallagan Nozimjon joriy yil 5-10 may kunlari Saudiya Arabistonida o‘tkazilgan APhO – Osiyo fizika olimpidasida bronza medalni qo‘lga kiritgandi. O‘zbekiston tarixida APhO olimpiadasida bunday natija hali bo‘lmagan. Nozimjonning nufuzli xalqaro fan olimpiadalarida erishyotgan bu kabi yutuqlari bardavom bo‘lsin.