Qo‘qon va Marg‘ilon shaharlariga berilgan “Jahon hunarmandlar shahri” maqomiga Rishton ham ega bo‘lishi kutilmoqda Viloyat hokimi Xayrullo Bozorov Butunjahon hunarmandlar kengashi (AISBL) prezidenti Saad al-Qaddumiy boshchiligidagi ekspert va mutaxassislar delegasiyasini qabul qildi. Uchrashuvda Prezidentimiz tomonidan so‘nggi yilllarda mamlakatimizda milliy hunarmandchilik, xalq badiiy va amaliy san‘atini rivojlantirishga qaratilayotgan yuksak e‘tibor, xalqimizning boy madaniy merosi hamda tarixiy an‘analarini saqlab qolish, hunarmandlarni qo‘llab-quvvatlash va ular faoliyatini jahon miqyosida targ‘ib etish bo‘yicha amalga oshirilayotgan ishlar alohida qayd etildi. Buyuk ipak yo‘lida joylashgan davlatlarda hunarmandchilik azaldan rivojlanib kelgani, xususan, Farg‘ona ham milliy hunarmandchilik markazlaridan biri ekani va bu soha bugungi kunda yangi bosqichga ko‘tarilayotgani ta‘kidlandi. Rishton tumaniga “Jahon hunarmandlar shahri” maqomini berish bo‘yicha olib borilayotgan ishlar bo‘yicha fikr almashildi. Shuningdek, Qo‘qonda o‘tkazilayotgan an‘anaviy xalqaro hunarmandchilik festivali va Qo‘qon hamda Marg‘ilon shaharlariga ushbu maqom berilgani ham e‘tirof etildi. Bu esa yangi ish o‘rinlari yaratilishiga, nogironligi bo‘lgan shaxslarni hunarmandchilikka jalb qilishga hamda oilalarning turmush farovonligini oshirishga xizmat qilayotgani haqida to‘xtalib o‘tildi. Shu bilan birga, hunarmandchilik rivoji turizm salohiyatini ham kengaytirishga turtki bo‘layotgani, daromad manbaiga aylangani ta‘kidlandi. Uchrashuvda ekspert va mutaxassislar tomonidan o‘zbekistonlik hunarmandlar bilan hamkorlikni yo‘lga qo‘yish, hunarmandchilik markazlari hamda xalqaro ko‘rgazmalar tashkil etish, sohaga oid ta‘lim tizimini rivojlantirish kabi masalalar yuzasidan fikr almashildi. Viloyat hokimi Butunjahon hunarmandlar kengashining milliy an‘analar va qadriyatlarni saqlash, hunarmandchilikni rivojlantirishdagi jahon miqyosidagi roli muhimligini qayd etib, samarali hamkorlik uchun minnatdorlik bildirdi va kelgusidagi hamkorlik tadbirlari yuzasidan kelishib olindi. Uchrashuvda Respublika “Hunarmand” uyushmasi raisi Rasuljon Mirzaahmedov hamda viloyat hokimining o‘rinbosari Xurshidjon Ahmedov ham ishtirok etdi. Ma‘lumot o‘rnida, Butunjahon hunarmandlar kengashi (AISBL) 1964 yilda tashkil etilgan bo‘lib, bosh qarorgohi Belьgiyaning Bryusselь shahrida joylashgan. Uning asosiy vazifalari — hunarmandchilikni jahon miqyosida targ‘ib etish, milliy va mintaqaviy tashkilotlarni qo‘llab-quvvatlash, xalqaro ko‘rgazma va festivallar, simpoziumlar o‘tkazish, shuningdek, hunarmandchilikni ta‘lim, innovasiya va iqtisodiyot bilan integrasiya qilishdir. Bugungi kunda mazkur kengash qaroriga asosan dunyodagi to‘rt qit‘ada joylashgan 60 ga yaqin shahar “Jahon hunarmandlar shahri” maqomini olgan. O‘zbekistonda esa Buxoro, Qo‘qon va Marg‘ilon shaharlari ushbu nufuzli maqomga sazovor bo‘lgan.