Farg‘ona shahrida “TalabaExpo – 2025” kasb ko‘rgazmasi bo‘lib o‘tdi. Viloyat hokimligi, Milliy bank, Oliy ta‘lim, fan va innovasiyalar vazirligi, Savdo-sanoat palatasi hamkorligida tashkil etilgan mazkur tadbir oliy ta‘lim muassasalari bitiruvchilarining bandligiga ko‘maklashish, ularni munosib ish o‘rinlari bilan ta‘minlash hamda tadbirkorlik faoliyatiga jalb etishdan iboratdir. Tadbirda mamlakatimizda yoshlarga, xususan, oliy ta‘lim muassasalari bitiruvchilariga yaratilayotgan imkoniyatlar, ularning bandligi va kelajakdagi barqaror va samarali faoliyatini ta‘minlash uchun amalga oshirilayotgan tizimli islohotlar haqida batafsil ma‘lumot berildi. “TalabaExpo – 2025” kasb ko‘rgazmasi doirasida bitiruvchi yoshlar uchun mavjud bo‘sh ish o‘rinlari, tadbirkorlik imkoniyatlari, shuningdek, “Kelajakka qadam”, “Xotin-qizlar tadbirkorligi” kabi dasturlar asosida taklif etilayotgan imtiyozli kreditlar bo‘yicha ko‘rgazma va taqdimotlar o‘tkazildi. 300 dan ortiq ish beruvchilar 2 mingdan ziyod bo‘sh ish o‘rinlarini taqdim etishdi. Mazkur ko‘rgazma bitiruvchilarga o‘z salohiyati, iqtidori va qiziqishlariga mos kasb tanlash, mehnat bozoridagi real ehtiyojlar bilan yaqindan tanishish hamda ish beruvchilar bilan yaqin aloqa o‘rnatish imkonini beradi.