Quvasoy shahar Pakana MFY hududidagi "Qo‘qon" erkin iqtisodiy zonasi Quvasoy filialida "Marwin fruitline" MChJ tomonidan mevani qayta ishlash va quyultirilgan tabiiy sharbat ishlab chiqarishga ixtisoslashgan zamonaviy korxona ishga tushirildi. Tantanali tadbirda viloyat hokimi Xayrullo Bozorov ishtirok etib, tadbir ishtirokchilarini yurtimizda keng nishonlanayotgan istiqlol shodiyonalari bilan qutladi. Barcha sohalar, iqtisodiyot erkinlashgani, tadbirkorlarga keng yo‘l ochilib, ularni qo‘llab-quvvatlash uchun davlat kafolatlari yaratilgani, xorijiy investorlarni kirib kelishiga katta imkoniyatlar bugun o‘zining natijasini berayotganligi, har yili yangi, katta-katta ishlab chiqarish quvvatlari, ijtimoiy yoki boshqa ob‘ektlar foydalanishga topshirilayotganligi, albatta, bularning barchasi islohotlar, tadbirkorlarni qo‘llab-quvvatlash natijasi ekanligi alohida e‘tirof etildi. Farg‘onada 50 ming gektardan ortiq bog‘, 10 ming gektarda uzumzor, 25 ming gektarda sabzavotlar borligi, yana yildan yilga yaratilayotgan bog‘lar hajmi ortib borayotganligi, yiliga 2000-3000 gektargacha yangi bog‘lar qo‘shilayotganligi, bu mahsulotlarni xorijiy bozorlarga eksport qilishda katta imkoniyat ekanligi aytib o‘tildi. Hamma mahsulotlarni xorijga yoki ichki bozorda to‘liq sotish imkoniyati mavjud emasligi bois, bu kabi zamonaviy korxonalar paydo bo‘lishi meva-sabzavotlarni qayta ishlash orqali uning qiymati yo‘qolishining ham oldi olinishida muhim ahamiyat kasb etadi. Dehqonlarni, bog‘bonlarni manfaatini oshiradi. Korxonaga 14 mln dollar investisiya yo‘naltirilib, Shvesariya va Italiyadan texnologiyalar olib kelib o‘rnatildi. Yillik ishlab chiqarish quvvati hozirda 115 mlrd, kelgusida 150 mlrd.so‘mga etishi rejalashtirilgan. Mahsulotlarning 80 foizini eksportga chiqarish ko‘zda tutilmoqda. Korxona 70-80 ming tonna barcha turdagi mevalarni qayta ishlash imkoniyatiga ega. Bu erda hozirda 120 ta ish o‘rni yaratilgan bo‘lib, kelgusida 500 ta ish o‘rni yaratilishi maqsad qilingan. Tadbirda korxona tashabbuskori Shavkatjon Zokirov va hamkorlariga minnatdorlik bildirildi. Bu korxonaning ikkinchi quvvatini ham ishga tushirish reja qilingani ma‘lum qilindi. Ramziy lenta qirqilib, mehmonlar korxonadagi ishlab chiqarish jarayonida asosiy e‘tibor mahsulotning tabiiyligini saqlashga, ekologik tozalik va xalqaro standartlarga moslikka qaratilayotligiga guvoh bo‘lishdi. Mazkur loyiha nafaqat hududdagi sanoat salohiyatini yuksaltirish, balki aholi bandligini ta‘minlash, qishloq xo‘jaligi mahsulotlarini chuqur qayta ishlash va eksport imkoniyatlarini kengaytirishda muhim ahamiyat kasb etadi.