“Qo‘qon” erkin iqtisodiy zonasida sut va sut mahsulotlari ishlab chiqarishga ixtisoslashgan korxona ishga tushdi “Sadaf sut” oilaviy korxonasi tomonidan ishlab chiqarilayotgan sifatli sut va sut mahsulotlari nafaqat viloyatimizda, balki yurtimizda ham xaridorgir. Zamonaviy texnologiyalar asosida faoliyat olib borayotgan korxona tomonidan yangi tarmoqlar ishga tushirilmoqda. Bugun “Qo‘qon” erkin iqtisodiy zonasida umumiy qiymati 2,7 mln dollar bo‘lgan "Sadaf sut smons" pishloq va turli sut mahsulotlari ishlab chiqarish loyihasi doirasida ikkinchi zavodi foydalanishga topshirildi. Natijada qo‘shimcha 100 ta yangi ish o‘rni yaratilishiga erishildi. Tantanali tadbirda viloyat hokimi Xayrullo Bozorov ishtirok etib, tadbir ishtirokchilarini yurtimizda keng nishonlanayotgan istiqlol shodiyonalari bilan qutladi. O‘z navbatida ushbu yangi korxona ham bayramga tadbirkorlarning munosib tuhfasi bo‘lganini qayd etdi. Viloyat rahbari tomonidan e‘tirof etilganidek, yurtimizda olib borilayotgan keng ko‘lamli islohotlar, xususan, tadbirkorlarga yaratilayotgan imkoniyat va imtiyozlar tufayli iqtisodiyotimiz yildan yilga mustahkamlanib bormoqda. Qulay tadbirkorlik va investisiya muhiti yaratilgani uchun "Qo‘qon" EIZda ham ishlab chiqarish quvvatlari soni ortib bormoqda, istiqbolli loyihalar amalga oshirilmoqda. —Xorijiy investisiyalar, kredit mablag‘lari ham o‘z o‘rnida kerak, shu bilan birga ichki imkoniyatlardan ham foydalanib, mahalliy tadbirkorlarni qo‘llab-quvvatlash ham doimiy e‘tiborimizda,—dedi viloyat hokimi.—Bu orqali so‘nggi yillarda hududlar va bu kabi alohida sanoat zonalarida yirik ishlab chiqarish korxonalari tashkil etilib, yuqori daromadli ish o‘rinlari yaratilayotgani e‘tiborga sazovordir. Tadbirda tashabbuskor tadbirkor Saidqosim Qoraboev faoliyatini yanada kengaytirish borasida amlaga oshirmoqchi bo‘lgan yangi va istiqbolli loyihalar alohida e‘tirof etildi. Ezgu maqsad ijobati yo‘lida oila a‘zolari birdam bo‘lib, katta muvaffaqiyatlarga erishayotganligi aytib o‘tildi. Hozirgi kunda 38 xil turdagi mahsulotlar ishlab chiqarilayotgan korxonada ish o‘rinlari 350 taga etdi. Yaqin istiqbolda ish o‘rinlari sonini 600 taga etkazish choralari ko‘rilayotgani e‘tiborga molik. Korxonada 2024-2025 yillar davomida qurilish ishlari amalga oshirilib, Turkiya, Rossiya va Xitoy davlatidan uskunalar olib kelib o‘rnatildi. Ayni paytda yillik quvvatni 3650 tonnaga etkazish hamda mahsulotning 10 foizini eksportga yo‘naltirish bo‘yicha aniq vazifalar belgilab olingan. Tantanali tadbirda nuroniylar ishtirokida ramziy lenta qirqilib, yangi korxonada ishlab chiqarilayotgan mahsulotlar, ish jarayonlari bilan tanishildi.