Avval xabar berganimizdek, “Qo‘qon” erkin iqtisodiy zonasidagi kafelь mahsulotlari ishlab chiqarishga ixtisoslashgan “Yong Xin” MChJ XKda sinov ishlari yakunlandi. Bugun rasman foydalanishga topshirilib, mahsulotlar sotuvi boshlandi. Tantanali tadbirda viloyat hokimi Xayrullo Bozorov, investorlar, tadbirkorlar, korxona ishchi-mutaxassislari hamda keng jamoatchilik vakillari ishtirok etdi. Tadbirda viloyat hokimi Xayrullo Bozorov barchani mustaqilligimizning 34 yilligi bilan samimiy qutlab, mazkur yirik loyihaning ishga tushirilishi bayramga munosib tuhfa bo‘lganligini ta‘kidladi. Mamlakatimiz taraqqiyotida so‘nggi 8 yil tarix solnomasida oldinga intilish yili bo‘lgani, xususan, biznes yuritish, tadbirkorlik rivoji uchun katta imkoniyatlar yaratilayotgani qayd etildi. Davlatimiz rahbari tashabbusi bilan erkin iqtisodiy zonalar tashkil etilib, minglab hamyurtlarimiz bandligi ta‘minlanayotganligi, investorlarga yaratilayotgan qulay investision muhit, imkoniyat va imtiyozlar natijasida yurtimizga kundan kunga investorlarning oqimi ortib borayotganligi, hamkorlikda istiqbolli loyihalar amalga oshirilayotganligi alohida e‘tirof etildi. Mazkur yirik loyiha ham viloyatimizdagi qulay investisiya muhitining amaliy samarasidir. Xitoyning to‘g‘ridan-to‘g‘ri investisiyasi hisobiga barpo etilgan ushbu korxonaning umumiy qiymati 100 mln dollar bo‘lib, hozirda 70 mln dollar sarmoya kiritildi. Buning hisobiga 700 ta yuqori daromadli doimiy ish o‘rni yaratildi. Korxona to‘liq quvvat bilan ishga tushgach ishchilar soni 1000 taga etkaziladi. Bu erga eng so‘nggi rusumdagi zamonaviy texnologiyalar olib kelib o‘rnatildi. Shu tariqa jahon bozorida xaridorgir va brend mahsulotlar ishlab chiqarish imkoni yaratildi. Ta‘kidlash joizki, korxonaning ilk mahsulotlari ayni kunlarda Qirg‘izistonga eksportga jo‘natildi. Xususan, o‘tgan qisqa vaqt mobaynida qo‘shni mamlakatga salkam 850 ming dollarlik mahsulot eksport qilindi. Mazkur korxonaning sifatli va raqobatdosh mahsulotlariga tashqi bozorda talab katta. Bu kabi korxonalarning ochilishi tuman iqtisodiyotini ham tubdan o‘zgartirishi, hudud rivojida muhim o‘rin tutishligi ta‘kidlandi. Ushbu loyihaning ta‘sischisi Suhbatilla Mirzaev ham so‘z olib korxonada ishlab chiqarish jadal olib borilayotganligi, bir yil ichida loyiha to‘liq ishga tushirilishi, mahsulotlarning eksport qilinayotganligi va rejalar xususida so‘z yuritdi. Viloyat hokimi korxonada yaratilgan sharoit bilan tanishib, investorlar bilan loyiha doirasida ishlab chiqarish quvvatlarini oshirish hamda hamkorlik ko‘lamini yanada kengaytirish borasida samimiy suhbatlashdi.