Farg‘onada 128 ta paxta terish mashinalari fermerlarga topshirildi Bugungi kunda viloyatimiz qishloq xo‘jaligida rivojlanishning yangi bosqichiga qadam qo‘yilib, ilg‘or texnologiyalar keng qo‘llanilmoqda. Endilikda ekin ekishdan tortib, yig‘im-terimgacha bo‘lgan butun jarayonlarni mexanizasiya asosida amalga oshirish ishlari jadal olib borilmoqda. Farg‘ona shahridagi sobiq Mexanika zavodi hududida “Ferghana Swan Cotton Industrial Machinery Stock Co., Ltd” korxonasi tomonidan ishlab chiqarilgan navbatdagi paxta terish mashinalarini viloyatimizda faoliyat olib borayotgan fermerlarga topshirish marosimida shu haqida so‘z bordi. Viloyat hokimi istiqlol bayrami munosabati bilan yig‘ilganlarni qutlab, yurtimizda barcha sohalar qatori qishloq xo‘jaligida amalga oshirilayotgan islohotlar haqida so‘z yuritdi. — Prezidentimiz manfaat uchun ishlash kerakligini o‘rtaga tashladi. Endi fermer reja uchun emas, manfaat uchun, daromad uchun ishlaydigan davr keldi. Qishloq xo‘jaligida yangi, zamonaviy ilm-fan yutuqlarini, texnologiyalarni, texnikalarni qo‘llash bo‘yicha ko‘rsatmalar berildi, mablag‘lar ajratilyapti. Yangiliklar kirib kelyapti. Va shuning natijasida yildan yilga hosildorlik oshib bormoqda, — dedi viloyat hokimi. Tadbirda o‘tgan yili paxtadan viloyat bo‘yicha o‘rtacha 40 sentnerga yaqin hosil olingani, joriy yilda esa bu kamida 50 sentner bo‘lishi kerakligi, shu bilan birga kelgusida o‘rtacha hosildorlikni 70–80 sentnerga etkazish reja qilingani aytib o‘tildi. Viloyatda o‘tgan yili 60 ta paxta terish mashinasi bo‘lgan bo‘lsa, bu yil Farg‘onada ishlab chiqarilgan 140 ta "Swan Cotton" paxta terish mashinasini olish reja qilingani, ayni kunga qadar 128 tasi sotib olingani ma‘lum qilindi. 200 ta terim mashinasi viloyatimizda mavsumda ishtirok etsa, paxta maydonining 60 foizini mashina bilan terib olish imkoniyati bo‘lishi, kelgusi yili bu ko‘rsatkich 90 foizga etishi qayd etildi. Paxta terish mashinalarini 20 foizlik dastlabki to‘lov bilan 10 yil muddatga lizing asosida xarid qilish imkoniyati mavjudligi, bunda paxta-to‘qimachilik klasterlari va fermer xo‘jaliklariga 15 foizlik subsidiya berilishi ta‘kidlandi. Shuningdek, mavsumda 1 tonna paxta uchun 1 mln so‘m davlat subsidiyasi berilishi ham amaliyotga joriy etilayotgani aytildi. Tadbirda so‘z olgan “Ferghana Swan Cotton Industrial Machinery Stock Co., Ltd” korxonasi rahbarlari o‘z faoliyatlarini yanada takomillashtirish, ishlab chiqarishni kengaytirish chora-tadbirlari haqida to‘xtalib o‘tdilar. Fermerlar ham so‘z olib, yaratilayotgan shart-sharoitlar va imkoniyatlar uchun Prezidentimizga minnatdorchilik bildirdilar. Tadbir davomida fermerlarga terim mashinalari kalitlari tantanali topshirildi.