Mustaqilligimizning 34 yilligi bayrami arafasida Qo‘qon shahridagi To‘laboy mahallasida zamonaviy “AKIF” xususiy tibbiyot muassasasi o‘z faoliyatini boshladi. Alisher Xodjaev tashabbusi bilan mazkur klinika qariyb 6 million dollar miqdoridagi sarmoya evaziga barpo etildi. Klinikada 80 o‘rinli stasionar hamda kuniga 250 nafar bemorga xizmat ko‘rsatish imkoniyatiga ega ambulator bo‘limlar faoliyat olib boradi. Loyiha natijasida 65 ta yangi ish o‘rni yaratildi. Tibbiyot muassasasining foydalanishga topshirish marosimi katta shodiyonaga aylandi. Tadbirda ishtirok etgan viloyat hokimi Xayrullo Bozorov yangi muassasa jamoasini qutlab, joriy yilning 20 avgust kuni davlatimiz rahbarining tadbirkorlar bilan uchrashuvida xususiy tibbiyot muassasalarini tashkil etishga imtiyozlar berilganini, kelgusida chegara hududlarda klinika, reabilitasiya markazi, mehmonxona va laboratoriyalarni o‘z ichiga olgan tibbiyot klasterlari tashkil qilinishini ta‘kidladi. Bugungi kunda viloyatimizda 1 ming 412 ta tibbiyot muassasasi mavjud bo‘lib, shundan 964 tasi turli yo‘nalishdagi xususiy klinikalar hisoblanadi. Xususiy sektorni rivojlantirishga berilgan e‘tibor orqali joriy yilda 32 ta diagnostika va davolash muassasalari tashkil etilib, 790 ta shifo o‘rni, 670 ta ish o‘rni yaratildi. Yangi zamonaviy klinikalarda qo‘shimcha xizmatlar yo‘lga qo‘yilishi natijasida joriy yilda 150 mingdan ortiq bemorlarga stasionar yordam ko‘rsatildi va 16 mingga yaqin jarrohlik amaliyotlari amalga oshirildi. Islohotlar natijasida bemorlarning 61 foizi Respublika markazlariga, 36 foizi chet elga borishi kamaydi. “AKIF” klinikasida kardiologiya, intervension kardiologiya, nevrologiya, endokrinologiya, gastroenterologiya, pediatriya, ginekologiya kabi muhim yo‘nalishlarda yuqori malakali tibbiy xizmat ko‘rsatiladi. Shuningdek, abdominal, endoskopik va bariatrik xirurgiya, urologiya, neyroxirurgiya, travmatologiya, stomatologiya va LOR jarrohlik kabi murakkab amaliyotlarni amalga oshirish uchun zamonaviy shart-sharoitlar mavjud. Yangi tibbiyot maskanida aholiga yaratilgan qulayliklar bilan yaqindan tanishildi.