Farg‘onada xususiy maktablar soni yana bittaga ko‘paydi Dang‘arada tuman markazidan 30 km olisda bo‘lgan Bog‘ish mahallasida zamon talablari darajasidagi “Mendeleyev school” xususiy maktabining tantanali ochilish marosimi bo‘lib o‘tdi. 840 o‘ringa mo‘ljallangan mazkur ta‘lim maskani uchun 20 milliard so‘m sarflanib, yoshlarning bilim olishi, iqtidor va salohiyatini yuksaltirishi uchun barcha shart-sharoitlar yaratilgan. 1-4 sinf o‘quvchilari uchun maxsus avtobuslar yo‘lga qo‘yilgan bo‘lsa, 5-11-sinf o‘quvchilari uchun 550 o‘rinli yotoqxona barpo etildi. Bu erda 92 nafar tajribali o‘qituvchi faoliyat olib boradi. E‘tiborli jihati, ushbu maktabga 4 mingdan ziyod o‘quvchi hujjat topshirgan bo‘lib, qabul uchun belgilangan minimal o‘tish bali 135 ballni tashkil etdi. Tadbirda ishtirok etgan viloyat hokimi Xayrullo Bozorov yig‘ilganlarni Mustaqillik bayrami bilan qutlab, istiqlol tantanalarini “Vatan uchun, millat uchun, xalq uchun!” shiori ostida o‘tayotganida ham o‘ziga xos ma‘no-mazmun borligini, hamma millat, butun xalq birlashsagina mustaqilligimiz mustahkamkam bo‘lishini qayd etdi. Dunyoning ilg‘or davlatlari ilm tufayli taraqqiy etayotgani, ilmsiz natijaga erishib bo‘lmasligini aniq misollar bilan aytib o‘tdi. 2017 yilda viloyatimizda 1 ta xususiy maktab faoliyat ko‘rsatgan bo‘lsa, xususiy sektorga yaratib berilgan sharoitlardan keyin o‘tgan 7 yilda 117 ta yangi maktab tashkil etilgani, natijada 36 mingdan ortiq o‘quvchi o‘rni yaratilib, 3 mingga yaqin ish o‘rni paydo bo‘lgani haqida to‘xtalib o‘tildi. - Joriy yil yakuniga qadar tadbirkorlarimiz tomonidan 13 ta xususiy maktab tashkil etilib, ularning soni 130 taga etkaziladi. Bu juda katta ko‘rsatkich. Bugungi kunda Respublika bo‘yicha jami 645 ta xususiy maktab faoliyat yuritsa, shularning 20 foizi aynan Farg‘ona viloyati hissasiga to‘g‘ri kelmoqda, - dedi viloyat rahbari. Yangi maktab tashabbuskorlariga minnatdorlik bildirib, bitiruvchilarning 99,2 foizi davlat granti asosida oliy ta‘limga qabul qilinganini yuqori baholadi. Bu erishilgan tajribani viloyatdagi boshqa maktablar ham o‘rganishi zarurligini ta‘kidladi. Xorijdagi maktablargina emas, viloyatdagi shunday etakchi maktablar tajribasini ham o‘rganish zarurligi aytildi. Tadbirda viloyat hokimi ushbu maktabdan etuk olimlar, davlat xizmatchilari, o‘z sohasining mohir bilimdonlari chiqishiga, dovrug‘i eng mashhur ta‘lim maskanlaridan ham o‘tib ketishiga tilak bildirdi. Ramziy lenta qirqilib, ishtirokchilar ta‘lim dargohida yaratilgan shart-sharoitlar bilan yaqindan tanishdilar.