Prezident topshirig‘i amalda: Marg‘ilonda Renovasiya dasturi asosida bunyod etilgan zamonaviy uy-joylar foydalanishga topshirildi Davlatimiz rahbari o‘tgan yil 11-12 iyulь kunlari Farg‘ona viloyatiga tashrifi chog‘ida marg‘ilonlik nuroniylar, jamoatchilik vakillari bilan uchrashuvida shaharda yangi uy-joy massivini qurish, barak, ma‘nan eskirgan uylar o‘rnida arzon va sifatli yangi uy-joylar barpo etish borasida topshiriqlar bergan edi. Mazkur topshiriqlar asosida Marg‘ilon shahrining “Ipakchi” mahalla fuqarolar yig‘inida 68 ta bir qavatli, ma‘nan eskirgan uylar mulkdorlarning roziligi bilan buzilib, Renovasiya dasturi asosida zamonaviy 440 xonadondan iborat 11 ta ko‘p qavatli uylar qurilishi boshlab yuborilgandi. Qisqa vaqt ichida bu erda barcha havas qiladigan zamonaviy uylar majmuasi barpo etildi. Bugun mustaqilligimizning qutlug‘ 34 yillik bayrami arafasida Renovasiya dasturi doirasida bunyod etilgan ushbu zamonaviy uy-joylarning tantanali foydalanishga topshirish marosimi bo‘lib o‘tdi. Tadbirda ishtirok etgan viloyat hokimi Xayrullo Bozorov istiqlol bayrami bilan barchani qutlab, so‘nggi 8 yilda yurtimizda Prezidentimiz Shavkat Mirziyoev boshchiligida Yangi O‘zbekiston g‘oyasi real voqelikka aylanib, katta o‘zgarishlar, bunyodkorlik ishlari amalga oshirilayotgani haqida so‘z yuritdi. Davlatimiz rahbarining o‘tgan yil viloyatimizga, xususan, Marg‘ilon shahriga tashrifi yangi tarixiy davrni boshlab berganligini, marg‘ilonliklarning orzulari ushalib, qadimiy va hamisha navqiron shahar chinakam ma‘noda ulkan bunyodkorlik maskaniga aylangani bildirildi. Hududlarni jadal kompleks rivojlantirish bo‘yicha chora-tadbirlar doirasida Marg‘ilon shahri bo‘yicha ham Prezident qarori qabul qilingani, “Navro‘z” mahalla fuqarolar yig‘inida “Yangi O‘zbekiston” massivi, Burhoniddin Marg‘inoniy ilmiy-amaliy va turizm majmuasini qurilish ishlari jadal olib borilayotganligi qayd etilib, 2025 yilning o‘zida shaharda 46 ta ko‘p qavatli uylar qurib bitkazilayotganligi ta‘kidlandi. Shulardan 35 tasi "Yangi O‘zbekiston" massivida qad rostlayotgan bo‘lsa, qolgan 11 tasi “Ipakchi” MFYda qurildi. “Ipakchi” MFYdagi o‘tgan asr o‘rtalarida qurilgan pastqam binolarda aholi kundalik hayot tarzi uchun zarur bo‘lgan oddiy shart-sharoitlar ham deyarli yo‘q edi. Tor uy-joylarda ikki-uch oilada 10–12 jon bir amallab kun ko‘rib kelardi. Bugun bu erda ma‘nan eskirgan uylar o‘rnida aholi roziligi bilan Renovasiya dasturi asosida zamonaviy ko‘rinishdagi yorug‘ va shinam xonalarga ega ko‘p qavatli uylar bunyod etildi. Uy-joylari buzilgan barcha oilalarga shu erning o‘zidan qurilayotgan ko‘p qavatli uylardan kompensasiya to‘lovisiz xonadonlar berildi. Eng muhimi, yashovchilar uchun barcha sharoitlar, qulay infratuzilma hamda bolalar maydonchasining mavjudligi yurtdoshlarimizga mamnuniyat bag‘ishlamoqda. Viloyat rahbari bunday zamonaviy uylarda yashash oilalarning dunyoqarashini, yashash tarzini o‘zgartirishini aytib, yangi uy egalarini qo‘shaloq bayram bilan tabrikladi. Savdo majmualari, mehmonxonalar qurib, shahar bunyodkorlik ishlariga o‘z hissasini qo‘shib kelayotgan marg‘ilonlik tadbirkorlarga ham minnatdorchilik bildirib o‘tdi. Tadbir davomida yangi xonadonlar kalitlari o‘z egalariga topshirildi. So‘z olgan marg‘ilonlik faollar o‘zgarish va islohotlardan quvonchda ekanliklarini aytib, davlatimiz rahbariga minnatdorchilik bildirdilar. Ramziy tasma qirqilib, tadbir ishtirokchilari xonadonlardagi shart-sharoitlar bilan yaqindan tanishdilar. Nuroniylar ishtirokida duolar qilinib, ezgu niyatlar aytildi.