Mustaqilligimizning 34 yilligi arafasida Farg‘onada yana bir yirik investitsiyaviy loyiha amalga oshirildi."Qo‘qon" erkin iqtisodiy zonasi Quvasoy filialida zamonaviy texnologiyalar asosida keramogranit plitalar ishlab chiqarishga ixtisoslashgan “Crown Ceramic” O‘zbekiston-Xitoy qo‘shma korxonasi o‘z faoliyatini boshladi. Korxonaning foydalanishga topshirish marosimida viloyat hokimi Xayrullo Bozorov, “Crown Ceramic” asoschilaridan biri Siang Chenggang, investorlar, tadbirkorlar, korxona ishchi-mutaxassislari hamda keng jamoatchilik vakillari ishtirok etdi. Viloyat hokimi barchani mustaqilligimizning 34 yilligi bilan samimiy qutlab, mazkur yirik loyihaning ishga tushirilishi investor va tadbirkorlarning bayramga munosib tuhfasi ekanligini ta‘kidladi. O‘tgan 8 yil ichida viloyatimizda tashkil topgan xorijiy korxonalar soni 3 karra oshgani, turli xorijiy investisiyalarni jalb qilishda, xorijiy davlatlar bilan aloqalarni mustahkam yo‘lga qo‘yishda Xitoy bilan aloqalar alohida o‘rin tutayotganligi qayd etildi. Xitoy O‘zbekistonning etakchi savdo hamkori va iqtisodiyotning yirik investoriga aylangani, ikki mamlakat o‘rtasidagi har tomonlama strategik sheriklik munosabatlari mustahkamlanib borayotgani, xususan, hududlararo hamkorlik faollashayotgani haqida so‘z yuritildi. Hamkorlikni shahar va tumanlarda ochilayotgan korxonalar misolida ham ko‘rish mumkinligi, bugungi korxona ochilishi ham hamkorlik mevasi ekanligi, ushbu korxona yurtimizda keramikani ishlab chiqarishning yangi, zamonaviy bosqichini boshlab berishi bilan ajralib turishi ta‘kidlandi. “Crown Ceramic” asoschilaridan biri Siang Chenggang ham so‘z olib, mazkur korxona Farg‘ona sanoat taraqqiyotining yangi mezoniga aylanishiga, “Bir kamar – bir yo‘l” tashabbusi doirasida yana ko‘plab muvaffaqiyatli hamkorlik loyihalarini amalga oshirishga ishonch bildirdi. Mazkur korxonaga 70 mln dollar, 30 mln dollar mahalliy tadbirkor va 40 mln dollar xitoy investisiyasi yo‘naltirildi. Yiliga 8 mln kv. metr keramogranit plitalar, ya‘ni 1 trln so‘mlik mahsulot ishlab chiqarilishi va shundan, 30 mln dollar miqdorida eksport amalga oshirilishi rejalashtirilgan. Korxona faoliyati natijasida 400 ga yaqin yangi ish o‘rinlari yaratildi va mahalliy aholi bandligi ta‘minlandi. Birinchi bosqichda bu erda Markaziy Osiyoda ilk bor 10 ming tonnalik to‘liq avtomatlashtirilgan press-uskunalar va keng hajmli pech o‘rnatildi. 2 metrgacha bo‘lgan formatlarda mahsulot ishlab chiqarilishi yo‘lga qo‘yildi. E‘tiborli jihati, energiya tejamkor, eng zamonaviy texnologiyalar joriy etilib, ko‘mirni ham kukunini alohida ishlatishning yangi tizimi joriy etilgani mahsulot tannarxining yanada arzonroq bo‘lishiga xizmat qiladi. Bu esa raqobatbardosh, sifatli mahsulotlar ko‘payishiga, aholiga qulaylik yaratishi bilan ahamiyatlidir. Tadbirda ramziy lenta qirqilib, rasmiy olov yoqish marosimi ham o‘tkazildi. Shundan so‘ng to‘liq avtomatlashtirilgan ishlab chiqarish texnologiyalari bilan tanishildi.