Viloyat hokimi Xayrullo Bozorov viloyat sektorlari rahbarlari bilan birga Dang‘ara tumani Chinobod MFYdagi kichik sanoat zonasida bo‘lib, yangi investitsion loyihalar bilan tanishdi.

“Zumrad nur Kokand” MChJga qarashli “Bibax techno group” korxonasi faoliyati ko‘zdan kechirildi. Mazkur korxonada xo‘jalik mahsulotlari, sovun, suyuq gel, poroshok ishlab chiqarish yo‘lga qo‘yilgan, o‘ndan ortiq ish o‘rni yaratilgan. Mahsulotlar ichki bozorga shuningdek, qo‘shni davlatlarga eksport qilinmoqda. Korxona rahbari Habibjon Xalilov viloyat rahbarlariga shular xususida ma‘lumot berdi. Viloyat rahbari tadbirkor ishini yuqori baholab, faoliyatini yanada kengaytirib, ish o‘rnini ko‘paytirish kerakligini ta‘kidladi.

Viloyat hokimi o‘rganishlari davomida tadbirkorlarning xorijlik hamkorlari bilan birgalikda amalga oshirmoqchi bo‘lgan investitsion loyihalari taqdimoti bilan ham tanishdi.

Kichik turk MFYda barpo etilayotgan xizmat ko‘rsatish obyektlaridagi qurilish jarayonlari borib ko‘rildi. Bu yerdagi inshootlarning 1-qavatida qurilish materiallari, kutubxona, savdo markazlari va yana qator obyektlar joylashtiriladi. 2-qavatida asosan tikuvchilik tashkil qilinadi, 300 ta yangi ish o‘rni yaratilishi ko‘zda tutilgan.

Viloyat hokimi tumandagi “Dan-hosil” fermer xo‘jaligi dala maydonlarida bo‘ldi. Fermer xo‘jaligi tomonidan paxta mavsumida ham oldi o‘rinlarda rejani ortig‘i bilan bajarishga erishilgan. Bu yilgi rejalar ham yuqori. Fermer xo‘jaligidagi ariqlar betonlashtirilgan, daraxtlar oqlangan. Bahorgi ishlarga kirishilmoqda. Viloyat rahbari bilan muloqotda fermer Serobjon Farmonqulov yutuqlari, kelgusi rejalari haqida aytib berdi.